Kordenador SERVE.I.P Estabelesementu Sukursal Covalima, Pedro Domingos dos Santos, hatete orsamentu ho montante $ 14,815.00 ne’e, halibur husi tratamentu dokumentu ka rejistu foun ba lisensamentu Unipesoal Lda no Em Nome Individual (ENIN), inklui renovasaun no alterasaunba lisensa komersial nian iha Covalima.

“Durante tinan tomak ida nia laran husi Janeiru to’o Dezembru 2023 SERVE. I.P Estabelesementu Sukursal Covalima hatama ona reseitas ba kofer estadu hamotuk $ 14,815.00, konaba osan involvimentu ne’ebé iha ne’e ita hare husi novu parte ba sektoral iha ne’e bolu ona sujeitu dekretu lei 83/2022 23 de Novembru ne’ebé mak troka ho dekretu lei 34 nian. Reseita hirak ne’e mai husi tipu Unipesoal Lda ho Em Nome Individual (ENIN), alende tipu rua ne’e sei iha mos iha tipu rua seluk ne’ebé bolu naran SA ho Rpreprezentante permanente ho sosiedade em nome dala barak sira iha ne’e laiha, sira la rejistu maibe sira kria sukursal ne’ebé maka rejistu iha Dili no sira nia kontinuasaun halo sukursal ka sanak iha Munisipiu Covalima, exemplu deit ita hare hanesan iha Banku BNCTL, BNU, Timor Telekom, Telemor, Telekomcel inklui RTTL.E.P mos ita bele tanba sira mos empreza publiku ne’ebé sira mos iha tipu ida ne’ebé ita bele rekolla” informa Kordenador SERVE.I.P Estabelesementu Sukursal Covalima Pedro Domingos dos Santos, ba RCCT iha nia k’nar fatin Kuarta (27/02).

Pedro Domingos dos Santos, dehan SERVER I.P Covalima atende barak liu sidadaun sira hasai lisesnsa Em Nome Individual (ENIN) duke lisensa ba Unipesoal Lda.

“Ami nia kliente sira mai loke iha ne’e ho individual maka barak liu, dala barak ita hare sira mai hasai lisensa hanesan kios, fa’an obralan, atividade ida ne’ebé barak liu em nome individual ne’ebé bolu ho naran badak ENIN, maibe hasai lisensa ba unipesoal Lda ne’e bele dehan barak bainhira iha renovasaun, maibe sir atu mai rejistu foun ne’e ladun barak iha tinan kotuk ba ne’e maibe unipesoal Lda ne’e bele sura 10 ba leten deit, bainhira kuandu sira mai hasai lisensa ida ne’ebé maka kona sujeitu haruka ba parte sektoral ne’e sira sei selu osan ho montante dolar Amerikanu nen nulu ($ 60.00) ba kada atividade iha tinan ida nia laran maibe ida ne’ebé la sujeitu sira sei la selu bainhira halo mudansa iha sira nia atividade ka sira muda ENIN ba unipesoal ne’e sira sei selu kustu, hanesan iha renovasaun bainhira sira halo renovasaun ne’e ida ne’ebé kona sujeitu sira sei selu maibe la sujeitu sira sei la selu no mos iha renovasaun ba CRC ida hanesan ne’e mak hanesan ohin ha’u dehan sujeitu ho parte renovasaun ne’e, atividade sujeitu ho CRC ne’e bainhira mate mak foin bele selu kustu” nia dehan.

Entertantu, iha tinan 2023 SERVE.I.P Estabelesementu Sukursal Covalima halo atendementu ba rejistu foun ENIN no Unipesoal Lda hamutuk 225, renovasaun hamutuk 444, no alterasaun ka mudansa hamutuk 83. Engkuantu tuir dekretu lei Nu. 83/2022 23 de Novembru konaba lisensamentu ba atividade ekonomia ne’ebé altera ona ba dekretu lei Nu. 34/2017 27 de Setembru, Previa ba Renovasaun ba atividade sujeitu sei selu osan $ 60.00 no renovasaun ba CRC selu $ 10.00 no ba rejistu ne’ebé mak kona selesaun sujeitu ne’e mak selu $ 60.00 ba atividade ida kada tinan.

Jornalista : Julio Salinas

Editor       : Chamot Nahac