Covalima (RCCT) 09-07-25- Tribunal Distrital Suai (TDS) hafoin hala’o julgamentu primeiru interogatoriu ba suspeitu MMS konaba kazu omosidu agravadu hodi halakon vitima Perigrina da Conceição nia vida iha area Jakarta 2 Munisipiu Ainaro Domingu foin lalais.
Defensor Publiku Nelson Saldanha Borges hatete Tribunal Distrital Suai Liu husi julgamentu primeiru interogatoriu aplika medida koasaun Prizaun Preventiva (PP) ba suspeitu MMS tanba deskonfia komete krimi omesidu agravadu hodi oho Perigrina da Conceição hafoin soe iha area Jakarta2 Munisipiu Ainaro.
“Di’ak ita nia prosesu faze primeiru ita halo ona horiseik. Iha fase primeiru interogatoriu no ohin tribunal lee despaixu ba iha aplikasaun koasaun nian no ohin tribunal aplika medida koasaun prizaun preventiva tanba iha ne’e deskonfia nia katak krimi omesidu agora ho kestaun sira ne’ebé mak produs iha primeiru interogatoriu ne’e sei iha faze tanba segredu Justisa” Defensor Publik Nelson Saldanha Borges, hatete.
Defensor Publik Nelson Saldanha Borges mos esplika katak, meske Tribunal lee sai ona Prizaun Preventiva ba Suspeitu MMS hafoin remata julgamentu primeiru intregatoriu maibe sei iha kontinuasaun ho investigasaun hodi hatene mais klaru konaba ba motive tomak, tan informasaun balu sei rai nudar segredu justisa.
“Entaun ha’u labele atu publika ba iha media mesmu media hatene ona iha faceboock, buat hotu Viral los iha ne’eba maibe em termus de kestaun Juridika ninian tanba sei iha faze segredu justisa no sei iha investigasaun ha’u labele transmit lai ba ita bo’ot sira” Defensor Publik Nelson Saldanha Borges, dehan.
Entretantu dadaun ne’e Suspeitu MMS, evakua ona ba iha Prizaun Suai iha Tabakolot hodi hein prosesu kontinuasaun.
Jornalista : Alfredo Barreto
Editor : Chamot Nahac
