Sidadaun ida ho naran Jose Cardoso halai sai husi Kuarentena Bairo Costa, Suai.

COVALIMA RCCT – Quarta Feira (14-10-20), mais ou menus tuku 10 dader, sidadaun Timor Oan na’in 1 ho naran Jose Cardoso halai sai husi Quarentina Bairo Costa Suai.

Medika Jeral Deonijia Terezina Agustinha Sarmento afirma ba RCCT, sidadaun Jose Cardoso ne’e tama husi Indonesia mai Timor iha dia 6 de Outubro, no iha loron 12 de Outobro, PNTL Covalima kaptura nia “Jose Cardoso” iha ninia rezindensia Suku Maudemu, Aldeia Kaikoli, hodi mai hatama kedas sidadaun Jose Cardoso iha Kuarentena Bairo Costa Suai mais ou menus iha tuku 4 lokraik dia 12 de October 2020.

Tanba ne’e Mediku Jeral Deonija haktuir katak; “ Kona ba sidadaun ne’ebe maka halai sai husi kuarentina ne’e, nia tama iha Timor iha loron 6 fulan Outubro ne’e, maibe husi parte polisia hetan nia iha dia 12 ne’e, iha momento ne’eba kedas ami foti nia iha nia hela fatin, depois ami lori mai iha kuarentena ne’e iha dia 12 fulan ne’e mais ou menus iha tuku 4:00 lokraik” Dehan médiku jeral Deonijia T.A Sarmento Iha Kuarentena Bairo Costa,Suai (14-10-20).

Deonija hatutan, iha quarta feira (14-10-20 dader san mais ou menus tuku 10 otl) derpente Polisia Investigasaun to’o mai Kuarentena atu halo konfirmasaun ho mediku sira , katak parte seguransa atu hasai sidadaun Jose Cardoso nia foto, ho ida ne’e, mediku Jeral nemos fo hatene ba sidadaun Jose Cardoso, hafoin sidadaun refere rona katak Polisia Ivestigasaun Covalima atu hasai nia foto, sidadaun refere halai sai kedas husi quarentena.

Tanba ne’e mediku Jeral ne’e mos informa kedas ba parte Polisia Investigasaun kona ba akontesementu ne’e.

Durante loron rua iha ne’e, nia la iha problema ruma depois atu halai sai ne’e laiha, derpente polisia investigasaun sira mai ko’alia ho ha’u atu hasai sidadaun ne’e nia foto, depois ha’u ba fo hatene nia tamba polisia sira atu hasai nia foto, nia mos hatan di’ak, maibe nia fila fali ba kotuk neba, ha’u la iha hanoin katak nia atu halai sai, depois ha’u tama fali ba bolu nia, nia la iha ona, depois ha’u mos langsung mai hato’o ba polisia sira katak nia halai ona, depois parte husi polisia sira mos ohin buka kedas nia maibe buka la hetan” Mediku Jeral Deonijia T.A Sarmento hakutu konta istoria kona ba Kronolijia sidadaun Jose Cardoso halai sai husi Kuarentena ne’e.

Liga ho akontesementu ne’e, Jornalista RCCT tenta atu halo konfirmasaun ho Polisia Municipio Covalima maibe Komandante Polisia Municipio Seidauk bele fo komentario liga ho relatorio husi Seksaun Investigasaun seidauk to’o Komandante nia meja da servisu.

Jornalista                : Tynho Gusmão

Editor                       : Chamot Nahac