Covalima (RCCT), 16 Setembru 2026 — Servisu Saúde Munisípiu Covalima rejista kazu Infesaun Respiratóriu Aguda (IRA) hamutuk 15.625 durante períodu Janeiru to’o Agostu 2026.
Bazeia ba dadus ne’ebé RCCT asesu husi Diretór Servisu Saúde Munisípiu Covalima, Domingos Sequiera, durante fulan ualu ne’e, Servisu Saúde rejista númeru moras oioin, ho IRA sai ida husi moras ne’ebé rejista ho númeru aas, hamutuk 15.625 kazu.
Aleinde IRA, Servisu Saúde Munisípiu Covalima mós rejista moras seluk, inklui Diareia Aguda 2.544 kazu, Pneumónia 2.093 kazu, Scabies 200 kazu, Ulcera Jenital no Sekresaun Vajinal 173 kazu, Mumps/Parotitis 122 kazu, Diareia ho Ran 90 kazu, Varicella 39 kazu, Fever with Rash 33 kazu, no Typhoid 27 kazu.
Dirijente Saúde ne’e esplika katak dadus kona-ba moras sira ne’e rekolla husi Sentru Saúde hitu no Postu Saúde 25 ne’ebé eziste iha Munisípiu Covalima.
Infesaun Respiratóriu Aguda (IRA) mak infesaun ne’ebé akontese iha sistema respiratóriu, hanesan inus, garganta no pulmaun, no dala barak dura tempu badak. IRA bele kauza husi vírus, hanesan influenza, RSV no vírus respiratóriu seluk. Baktéria mós bele kauza infesaun respiratóriu, inklui pneumonia.
Sintoma IRA nian bele inklui inus-been ka inus-taka, dor garganta, isin-manas, dor ulun ka dor isin, no susar iis, liuliu bainhira infesaun grave.
IRA bele transmite husi ema ba ema liuhusi gotíkula respiratóriu bainhira ema infetadu tos ka sneeze, no mós liuhusi kontaktu ho liman ka superfísie ne’ebé kontaminadu.
Iha sorin seluk, Xefe Sentru Saúde Postu Administrativu Fatululik, Alberto Noronha, relata katak iha Sentru Saúde Fatululik mós kazu IRA kontinua aas, no dadus sira relata ona ba Servisu Saúde Munisípiu Covalima.
“Moras ne’ebé aas durante fulan ualu ami rejista hamutuk IRA, tuir fali moras diareia. Kona-ba númeru moras seluk, ha’u la lembra tanba dadus sira submete ona ba Servisu Saúde Munisípiu Covalima,” nia dehan.
Jornalista: Paul Mandeu
