Covalima (RCCT) 15-02-24-Maske Komunidade iha Aldeia Aitos, Suku Dato Rua, Postu Administartivu Fohorem asesu ona ba liña eletrisidade maibe kompaña ne’ebé implemeta projetu dada liña eletrisidade ne’e seidauk selu Traballador ne’ebé uluk servisu ke’e rai kuak 84 hodi hari rin eletrisidade ho medida, naruk metru 12 no mentru 9 ne’ebé kada rai kuak ida selu $ 7.50, aleinde ne’e, kompaña mos seidauk selu traballdor sira ne’ebé halo servisu dada fiu eletrisidade ne’ebé tuir kontratu loron ida selu $ 5.00 ba kada traballador na’in.

Nune’e Traballador Antonio Ferreira lamenta hodi konfesa ba RCCT via telfone Kinta ohin (15/02) dehan hahu husi tinan 2018 to’o agora kompaña Lokal Hemiva.Unip,Lda ho kompaña Nasional Nur Di’ak, Unip.Lda seidauk selu nia osan hamotuk $ 1,500, seidauk selu mos traballador sira seluk ne’ebé halo kontratu “Harian” loron ida selu $ 5.00, hodi dada fiu eletrisidade.

“Ami maka ke raikuak ho harian ida tuir dada kabel ho besi rin ne’e no ha’u mak toma konta no kompaña ne’e la selu to’o agora, sia mai kontratu ba rai kuak. ami serbisu halo kelompok ba iha rai kuak no ami ke rai kuak iha 92 no kada rai kuak sia selu $ 7.50 ne’e mak to’e oras ne’e sira la selu. Ahi agora ema inagura ona. Ministru mai resmi ahi ne’e ami hato’o, ahi ne’e ohin resmi maibe ami nia kolen ne’e kompaña seidauk selu ho ida ne’e ministru halo karta ida no sira prontu atu selu ami kan rai kuak no harian, to’o agora sia la selu ami ba husu sira bosok dehan selu fo tekni sira ona ne’ebé ami povu ne la hatene to ida ne’eba” Traballador Antonio Ferreira konfesa ba RCCT via telfone Kinta (15/02).

Nune’e mos Via telefone Xefe Aldeia Aitos, Inacio Ximenez konta ba RCCT, konaba projetu dada liña eletrisidade ne’e hahu kedas iha tinan 2018 husi kompaña Lokal Hemiva.Unip,Lda ho kompaña Nasional Nur Di’ak, Unip.Lda mak implementa projeitu ne’e iha baze.

“Eletrisidade ne’ebé mak liga mai iha Aitos ne komesa iha 2018 iha neba sia la liu hosi tenderizasaun depois nia prosesu ne kleur foin hetan tenderizasaun depois foin lalais sira halo lansamentu iha 2023 no iha primeiru sira mai ne’e hari uluk iha Dato rua depois hotu tia sia mai sukat iha Aitos ida ne’e kompaña lokal ida naran enivan mai halo konstrusaun depois sira fa’an fali ba kompaña naran Nurdiak mak mai halo inplementasaun iha baze ne’e, iha momentu kompaña husi Nurdiak ho enivan halo kontratu ho komunidade sira konaba atu ke rai kuak no iha kontratu $ 7.50 kada raikuak ida” Xefe Aldeia Aitos Inacio Ximenes Esplika.

Engkuantu informasaun ne’ebe RCCT asesu katak iha loron 20 fulan maiu 2023, kompaña Lokal Hemiva.Unip,Lda ho kompaña Nasional Nur Di’ak, Unip.Lda halo ona akortudu eskrita hodi garantia katak atu selu traballador sira nia osan, maibe to’o agora kompaña tur haluha, la liga ho traballador sira nia osan ne’e. Akordu ne’e hetan asinatura husi reponsavel Nur Di’ak, Unip, Lda no responsavel kompaña Hemiva, Unip, Lda, sai sasin ba akordu ne’e mak xefe suku dato rua iha tempu ne’eba no mos Xefe Aldeia.

Entrentau to’o notisia ne’e hatun RCCT seidauk hetan konfirmasaun ba asuntu ne’e husi na’in ba Nur Di’ak, Unip, Lda no mos kompaña Hemiva, Unip, Lda.

Reportazen RCCT

Editor :Chamot Nahac