Covalima (RCCT) 11-04-25-Prezidente Autoridade Munisipiu (PAM) Covalima, Miguel Armada Cardoso ‘Razao” husu governu tau atensaun hodi halo manutensaun ba Auto Estrada ne’ebé durante tinan hirak liu ona rai monu hodi taka metin dalan, halo komunidade sira labele utiliza.
Rai no Fatuk Monu Taka metin Auto Estrada iha Kilometru Lima (KM5) ne’e hahu kedas iha Mandatu Governasaun da ualu (VIII) iha fulan Augusto 2020, iha area Suku Debos no Suku Ogues, maibe to’o agora governu liu husi Instituisaun Jestaun Ekipamentu (IGE-Sigla Portuguesa) Ministeriu Obras Publika seidauk ra’ut rai no dudu sai fatuk iha dalan k’laran tanba laiha ekipamentu utiliza hodi harahun fatuk bo’ot.
“Auto Estrada hahu husi Sskola Sekundaria Jeral Publiku Suai mai to’o Zumalai, ita agradese katak buat balu La’o, maibe to’o ohin loron iha problema ida ka rua sempre akontese hanesan rai taka ona auto estrada balu, tanba ida ne’e maka ha’u husu Ministru Petroliu no Rekursu Minerais atu hare kestaun ida ne’e.” dehan PAM.
Hatan ba PAM Nia preokupasaun ne’e, Ministru Petroliu no Rekursu Minerais, Francisco Monteiro, dehan Auto Estrada faz parte husi projeitu tasi mane, tan ne’e iha planu Ministeriu no preve ona fundu infraestrutura nian Governu hodi halo manutensaun iha tinan ida ne’e.
“Hanesan ha’u temi ona katak auto estrada la’os izoladu ida ne’e fas parte husi projetu Tasi Mane ne’ebe nia nia intensaun atu viabiliza dezenvolvimentu bo’ot ida, dezenvolvimentu ekonomia no setor Petroliu iha Timor-Leste, entaun husi ne’eba maka desde inisiu kedas halo Aero Portu Suai, no mos halo auto estrada segimentu ida husi Suai mai to’o Zumalai, Agora atu hatutan fali husi Zumalai ba Natarbora, kestaun konaba segimentu Auto Estrada Primeiru nian iha impaktu uitoan husi dezastre naturals ne’e tama ona iha Ministeriu no mos tama ona iha fundu infraestrutura, tinan ida ne’e ita sei lansa ba halo manutensaun”informa MPRM Francisco Monteiro.
Nonu Governu liu husi MPRM kompromete ona atu halo manutensaun ba Auto Estrada hahu husi Suai to’o Zumalai iha tinan ida ne’e.
Notisia Relevante : https://www.rcct.tl/tinan5-ona-fatuk-boot-no-rai-hakoi-alkatraun-iha-auto-estrada-km5/
Jornalista : Julio Salinas
Editor : Chamot Nahac
