Covalima (RCCT) 26-11-24-Ministeriu Interior (MI) liu husi Komandu Jeral Polisia Nasional Timor-Leste (PNTL) Sosializa Lei estatutu PNTL artigu 155 ko’alia ba promosaun Tranzitória PNTL nian ne’ebé promulga ona husi Prezidente Republika.
Xefe Gabinete Ministeriu Interior (MI) hanesan mos Xefe Ekipa Promosaun Tranzitória PNTL, Paulo Ássis Belo, hatete sosializasaun ne’e importante ba membru PNTL, ne’ebé foka liu ba kualidade hodi promove ka sa’e deviza.
“Lori Komandu Jeral mai iha Covalima atu halo sosializasaun konaba estatutu PNTL ne’ebé promulgadu ona husi Prezidente Republika liliu konaba artigu 155 ne’ebé ko’alia konaba promosaun Tranzitória ba PNTL, ita presija halo sosializasaun maibe servisu ida ohin loron ne’e liliu konaba promosaun Tranzitória ne’ebé governu hakarak hala’o ba membru PNTL, iha sosializasaun ne’e ami esplika konanba artigi 155 ne’ebé ko’alia konaba modalidade, modalidade ida ne’ebé presija atu bele sa’e deviza atu bele promove sira, iha artigu ne’e iha modalidade 6 ne’ebé membru polisia sira tenke iha para bele promove sira nia deviza” Paulo Ássis Belo, esplika.
Estatutu PNTL nia Artigu 155 ne’e mos ko’alia konaba modalidade 6 ne’ebé membru PNTL sira tenki iha atu promove sira nia diviza.
“husi modalidade 6 ne’ebé maka ko’alia konaba membru PNTL sira hanesan modalida ida ko’alia konaba sira nia atividade ne’ebé liu ona tinan 10 governu promove, modalida segundu konaba sira ne’ebé uluk membru Libertasaun funu na’in ka veteranus sira ne’e mos governu hakarak promove, modalidade datoluk nia konaba iha krize 2006-2008 membru PNTL kontinua iha eskuadra ka kuartel mantein sira nia servisu hodi fo apoiu populasaun durante krize nia laran, modalidade ba dahaat maka ko’alia konaba Klasse 1-25 ita hakarak mos promove sira, modalidade dalimak maka ba sira ne’ebé Klasse 26-73 ho idade 50 anos ba leten ne’e governu hakarak fo atensaun promove sira, modalidade ida ikus liu maka sira ne’ebé iha UNTAET nia tempu sai hanesan komandante eskuadra, komandante seksaun, kargu xefia sira ne’e mos governu nia hakarak promove sira ba deviza ida ne’ebé as liu” tenik Xefe Gabinete iha Ministeriu Interior (MI), hanesan mos Xefe Ekipa Promosaun Tranzitória PNTL, Paulo Ássis Belo,, ba jornalista hafoin remata Sosializa lei promosaun Tranzitória ba membru PNTL sira iha Munisipiu Covalima ne’ebé hala’o iha Salaun enkontru Polo Munisipiu Covalima, Tersa (26/11).
Engkuantu Komandante PNTL Munisipiu Covalima, Superintendente Polisia Calisto Gonzaga haktuir membru PNTL hamotuk na’in-158 maka prense visa ne’ebé simu husi komiusaun promosaun Tranzitória.
“Sosializasaun ne’e hanesan mai halo esklaresementu ba PNTL hotu husi munisipiu ida ba munisipiu para atu bele prepara hela prense visa, entantu visa ne’ebé ami simu ho ita nia rekursu ne’ebé ita iha hamutuk 158 pesoas, ne’e hotu-hotu prense, agora kestaun ne’ebé husi ekipa ka komisaun atu hili se maka sa’e no se maka la sa’e ne’e la’os kompeténsia husi munisipiu, ne’e ita intrega ba komisaun, purtantu iha problema lubuk ida maka instituisaun durante ne’e atraves ohin esplika ona ne’e, balu liu tiha ona antigidade 14-15 anos la hetan promosaun, balu ne’ebé uluk veteranus tes bebeik maibe laliu hela deit ne’e problema hotu, balu ne’ebé uluk kaer xefia iha UNTAET nian mais devisa ki’ik ate a data nunka mais konsidera, balu idade 50 anos ba leten nunka konsidera, balu ida klasse 1-25 to’o ajente xefe mos nunka konsidera, tanba ne’e maka iha nonu governu identifika problema hirak ne’e mak tama hela promosaun Tranzitória , promosaun Tranzitória ne’e dehan katak hare tiha problema sira ne’e hotu foin tama ba promosaun normal” dehan Komandante PNTL Munisípiu Covalima Superintendente Polisia Calisto Gonzaga.
Tuir Xefe Ekipa Promosaun Tranzitória PNTL, Paulo Ássis Belo, katak nonu governu hakarak promove membru sira ne’ebé iha diviza as liu, maibe ho dalan sira ne’e la presija rekezitus sira ne’ebé hakerek iha lei, tanba promosaun normal sira tenki tuir teste, ka rekejitus ida ne’ebé maka sira tenke la’o tuir kondisaun espesiais ne’ebé hakerek iha sira nia estatutu tuir modalidade sira ne’ebé hakerek iha lei.
Entertantu sosializasaun ne’ebé hanesan antes ne’e hala’o ona iha Munisipiu Dili, Ermera, Likisa, Aileu, Manufahi, no ohin iha dader Covalima, lokraik kontinua ba Munisipiu Ainaro.
Jornalista : Julio Salinas
Editor : Chamot Nahac
