Covalima (RCCT) 07-03-25-Administrasaun Munisipiu Covalima (AMC) liu husi Servisu Munisipal Administrasaun no Rekursu Humanus (SMARH), Sesta ne’e publika ona lisata kanditarua ba vage Ajenti Administrasaun Publiku (AAP) hamotuk na’in 308 ne’ebé pasa iha selesaun dokumentus.
Diretór Servisu Munisipal Administrasaun no Rekursu Humanu, Munisipiu Covalima, José Manuel Gonçalves, hatete Covalima nia oan ne’ebé hatama dokumentu ba vaga ajenti administrasaun ne’e loke ba ema na’in 49 ne’ebé sei hala’o servisu Apoiu Autoridade Munisipiu Covalima iha area tekniku administrasaun finansas, Enjeñaria Arkitetóniku no Enjeñaria Sivil.
“Husi vaga ne’ebé maka foin dadaun husi parte rekursu humanu ou Administrasaun Munisipiu Covalima loke ne’e ba kategoria tolu hanesan grau C prezija ema na’in-16, husi na’in-16 grau C iha tekniku administrasaun finansas ema na’in-4, Enjeñaria Arkitektur ema na’in-6 no Enjeñaria Sivil ema na’in-6 ne’e ba grau C nian, ba grau D presija ema na’in-16, grau E presija ema na’in-17 ba apoiu administrasaun finansas ne’ebé total vaga ne’e presija ema na’in-49,” ” Diretór Servisu Munisipal Administrasaun no Rekursu Umanu Munisipiu Covalima, José Manuel Gonçalves, Informa.
Diretór ne’e ralata iha ema na’in iha Covalima oan na’in 490 mak submete dokumentu hodi kompete ba vaga hamotuk 49, maibe sorti di’ak monu deit ba ema na’in 308 no na’in 182 maka lapasa iha selesaun dokumentu ne’ebé hala’o husi Ministeriu Admistrasaun Estatal liu husi Diresaun Nasional Rekursu Umanu no Servisu Munisipal Administrasaun no Rekursu Umanu Covalima hamotuk ho Komisaun Funsaun Publiku.
“Sira mai submete dokumentus total ema na’in-490, husi ema na’in 490 ne’e iha sira ne’ebé liu ba iha selesaun dokumentus ba grau C iha administrasaun no finansas ema na’in-33 liu no na’in-32 la liu, depois iha arkitektu nian sira na’in-9 maka liu no na’in-12 la liu, Enjeñaria sivil sira na’in-15 liu no na’in-18 la liu, ba iha grau D sira na’in 50 liu no na’in-99 la liu, grau E ema ne’ebé liu hamutuk na’in-204 no la liu na’in-19” José Manuel Gonçalves, dehan tan.
Diretór Servisu Munisipal Administrasaun no Rekursu Umanu Munisipiu Covalima, José Manuel Gonçalves, afirma sidadaun sira ne’ebé pasa iha selesaun dokumentu ba Vaga Ajenti Administrasaun Publiku hamotuk ema na’in 308 ne’e sei ba tuir teste eskrita iha Komisaun Funsaun Publiku iha Dili, ne’ebé sei realiza iha loron 20 fulan Marsu 2025.
Jornalista : Julio Salinas
Editor : Chamot Nahac
