COVALIMA—-Prezidente Hononorario Futeboll Timor-Leste, Francisco Kalbuady Lay, Sesta (24/02) loke abertura jogu Xanana Cup iha Munisipiu Covalima.
Iha intervensaun Prezidente Hononorario Futeboll Timor-Leste, Francisco Kalbuady Lay, hateten iha futeboll sei laiha fronteira, maibe Futeboll ba ema hotu-hotu tantu atu ema kiik ka boot.
“Iha biban ne’e atu hato’o mos Avo Nana nia mensajem fo parabens ba oan no bei oan jogador sira iha Covalima katak iha Futeboll laiha fronteira, Futeboll la haree ras, la haree kor maibe Futeboll ba ema hotu-hotu” Prezidente Hononorario Futeboll Timor-Leste, Francisco Kalbuady Lay hato’o mensajem Xanana nia ba jogador sira iha Kampu Ladi Camanasa, hafoin loke abertura ba jogu Xanana Cup iha Munisipiu Covalima.
Kalbuady hameno ba jogador sira katak imi mai partisipa iha eventu ida ne’e atu joga bola no hatudu talentu ne’ebe imi, kria amizade, hadomi malu, kria estabilidade Paz ho dame liliu iha tempu koresm nia laran nudar ema sarani joga bola laos tanba manan deit no labele mos hirus tanba lakon importante liu bele kria amizade entre jogador sira hatu jogu kapas ida ba penonton sira hotu bele apresia ho ita boot sira nia jogu.
Tasa Avo Nana hahu ona husi Dili ema asiste rame tebes hanesan mos iha Munisípiu Baukau, Lautem, fila fali mai to’o ona Ermera ho Bobonaro ohin kontinua loke tan iha rai Covalima.
Premiu ba.primeiru lugar sei hetan tasa mai duni husi rai liur ne’e laos tasa baibain ho primeiru lugar sei hetan osan ho montante rihun $ 1, segundu lugar $ 750.00, terseiru lugar hetan osan ho montante $ 500.00 ne’e hotu-hotu hanesan ho munisipiu sira seluk hanesan Baukau, Bobonaro, Ermera no Lautem.
Kalbuady sublina Komisaun Organizador mos sei haree no fihir jogador diak liu, hatama golu barak liu ho ekipa terrain inklui haree mos ba guarda ida ne’ebe diak liu purtantu iha premiu 6 kedas, ne’ebe laos deit tanba premiu ho osan ne’ebe temi ona maibe importante liu imi jogador sira tenke kria amizade entre imi no mos hatudu imi nia talentu nudar ema jogador diak ida.
Adiministrador Postu Administrativu Suai, Luizinho do Rego, hateten hanesan autoridade lokal governu atu dezenvolve desportu iha Munisípiu Covalima laiha rezerva prontu atu kolabora apoiu atu nune’e desportu iha Covalima bele dezenvolve ho lais no diak liu tan iha tempu oin mai.
“Ba desportu hanesan autoridade lokal, governu atu dezenvolve, atu suporta atu halo dezenvolvimentu ba desportu iha Munisípiu Covalima ita laiha rezerva se deit ita prontu kolabora, prontu fo apoiu atu nune’e ita nia desportu iha Covalima bele dezenvolve ho lais no diak liu tan iha tempu oin mau” nia APA Suai afirma.
Administrador dehan maske Covalima menus fasilidade ba desportu ninian ne’ebe maka to’o ohin loron sei dauk bele responde durante iha Ukun-an tama ona ba tinan 20, Munisípiu Covalima sei deuk bele hetan mini kampu ida ne’ebe sufsiente kompara ho munisipiu sira seluk.
Maibe joventude foin sae sira iha Munisípiu Covalima iha antusiasmu, iha vontade maka’as atu inklina-an iha desportu Futeboll ninian tanba ne’e Clubu futeboll sira iha Covalima loron ba loron kontinua aumenta ba bebeik.
Tanba hakarak kongratula ba iha ekipa Avo Nana Cup ninian ne’ebe reprezenta husi Prezidente Komite Olimpico, oinsa maka tasa ida ne’e labele para deit iha tinan ida ne’e maibe bele kontinua iha tinan sira tuir mai atu nune’e bele haburas diak liu tan desportu Futeboll iha Munisípiu Covalima.(Azu)
