Covalima (RCCT) 18-08-25-Ministeriu Administrasaun Estatal (MAE) no Komisaun Funsaun Públiku (KFP) fo pose ba funsionariu Ajente Administrasaun Publiku (AAP) hamotuk na’in 49 iha munisipiu Covalima.
Iha Serimonia tomada pose ne’e, Prezidente Autoridade Munisipiu (PAM) Covalima, Miguel Armada Cardoso kondigu Razão, husu ba empozadu sira atu hala’o k’nar ho didi’ak hodi apoiu servisu iha munisipiu covalima.
“Iha ema atus hat mak kompete, imi na’in hat nulu resin sia maka konsege hetan oportunidade. Oportunidade ne’e la’os atu hodi halimar. ita bo’ot sira persiza hatene dever. Ba imi na’in hat nulu resin sia, orsamentu husi ita Administrasaun Munisipiu rasik,” husu PAM Covalima Miguel Armada Cardoso.
Reprezenta prezidente Komisaun Funsaun Publika, Agapito Conceição husu empozadu sira atu integra iha pozisaun hanesan Ajente Administrasaun Publika, atu halo servisu ho di’ak bazeia tuir termu aseitasaun durante ba tinan, hafoin sei hetan avalisaun husi diresaun ida idak, wainhira lahatudu komportamentu di’ak, la hala’o dever tuir estatutu funsaun publiku maka automatikamente sei la extende tan kontratu.
“Pesoal sira, hanesan Ajente Administrasaun Publika iha termu aseitasaun ida ne’e fulan ne’en, maibe agora ba tinan ida, depois avalisaun husi ida idak nia diresaun avalia sira ne’eba iha avaliasaun di’ak sei extende tinan tuir mai, ne’ebé servisu ho di’ak no hatudu badinas tanba estatutut funsaun publiku hatete ona katak deveres sira kuandu ita tuir ita nia deveres sira automatikamente ita nia direitu sei tuir mai se karik ita nia dever ita la dun hala’o ho di’ak ita nia direitu as ves para deit dalan, katak ita la kontinua sai funsionariu” Reprezenta prezidente Komisaun Funsaun Publika, Agapito Conceição, esplika.
Molok ne’e iha Covalima oan na’in 490 mak submete dokumentu hodi kompete ba vaga hamotuk 49, maibe sorti di’ak monu deit ba ema na’in 308 maka pasa iha selesaun dokumentu ne’ebé hala’o husi Ministeriu Admistrasaun Estatal liu husi Diresaun Nasional Rekursu Umanu no Servisu Munisipal Administrasaun no Rekursu Umanu Covalima hamotuk ho Komisaun Funsaun Publiku.
Empozadu na’in 49 ne’e pose ba kategoria grau C ema na’in-16, grau D ema na’in-16. grau E ema na’in-17. Ne’ebé sei hala’o servisu nudar tekniku administrasaun finansas, Enjeñaria Arkitektur no mos Enjeñaria Sivil.
Notisia Relevante : https://www.rcct.tl/kompete-ba-vaga-aap-covalima-sidadaun-nain-308-pasa-iha-selesaun-dokumentus-nain-182-adia-sorti/
Jornalista: Alfredo Barreto
Editor : Chamot Nahac
