Covalima (RCCT) 02-09-20- G7+ halo sosializasaun ba estudante no joventude sira, konaba papel no servisu G7+ nian iha Timor Leste, tamba organizasaun ne’e halo serbisu barak ona, no susessu iha nivel mundial.
Tan ne’e G7+ mai iha Covalima ho hanon atu Sosializa Papel importante husi G7+ nian mak atu promove membru nasaun sira hodi fo esperiensia ba malu hodi sai husi konflito ba desenvolvomento ekonomia nebe maka sustentavel, dehan Chefe Operasional Organizasaun G7+ Felix Piedade ba RCCT Quarta Feira (02-09-20).
“ Objektivu ami mai iha ne’e atu fahe informasaun konaba G7+ ninia papel no servisu ba ita komunidade, estudante, no Joventude sira iha Covalima, nune’e sira bele hatene kona ba ezistensia G7+ ninian”Dehan Feliz.
Feliz Mos dehan organizasaun G7+ mos halo ona servisu barak no hetan susesu lubuk ida ona iha Nivel Mundial no Timor Leste mos hola parte hanesan Fundaor ba G7+ ne’e.
“ G7+ halo nia servisu nebe hetan sussesu barak iha nivel mundial liliu kona ba oinsa mak atu hadok aan husi konflitu no mos dezenvolvementu sustentavel ekonomi iha rai laran, no ita Timot-Leste mos sai hanesan fundador ba organizasaun ida ne’e” Katak Chefe Operasional Organizasaun G7+ Felix Piedade.
Felix Piedade hatutan, sosializasaun ne’e kobre ona iha Municipio 7 inklui mos Municipio Covalima, no kada Municipio ida kobre deit iha Posto Administrativu 2 maibe iha Covalima rasik foin kobre iha Postu Administrativu Suai no sosializasaun ne’e targetu liu ba komunidade em jeral maibe fokus liu ba juventude no estudante sira.
“ Ami nia Atividade ne’e ami planu atu kobre iha Municipio hotu, maibe oras ne’e dadaun ami kobre ona iha Municipio 7 inklui iha Municipio Covalima ne’e rasik, no iha Municipoi Covalima oras ne’e dadaun ami foin hala’o iha Postu Suai, iha Municipio seluk ami hala’o iha postu administrative 2 tanba ne’e ha’u espera katak iha komunidade sira bele komprende di’ak liu tan konaba lala’ok G7+ ninian” Dehan Chefe Operasional G7+ Felix Piedade.
Relasiona ho ne’e, representante Joventude Covalima Faustina Rita nebe partisipa iha sosializasaun ne’e afirma nia parte sente orgulho ho sosializasaun ne’e, tamba durante ne’e, hanesan juventude seidauk hatene papel G7+, maibe liu husi sosializasaun ne’e bele hatene oinsa serbisu G7+ nian iha Timor Leste.
“ Durante ne’e ami rona deit naran G7+ maibe ami lahatene katak sira nia lala’ok sevisu ne’e oinsa, tan ne’e mak ohin loron ami senti kontenti ho sosializasaun ne’e ami bele hatene ona kona ba programa no lala’ok G7+ ninian”.
Tanba ne’e Juventude Feto Rita mos husu ba G7+ atu kontinua nafatin halo sosializasaun ne’e ba to’o iha komunidade no juven sira seluk nebe hela iha Postu Administrativu sira nebe hela iha area Rurais, Rita hakutu.
Engkuantu sosializasaun ne’e hala’o iha salsaun Eskola Sekundaria Geral Publika (ESGP)-Suai no partisipa husi estudante eskola sekundaria 3, mak hanesan estudante husi Ekola Tektika Vokasional (ETV) Akar Laran, Eskola Teknika Vokasional (ETV)Cristal, inklui Estudante husi Eskola Sekundaria Geral Publika-Suai ne’e rasik.
Jornalista : Tynho Gusmão & Asatu
Editor : Chamot Nahac
