Covalima (RCCT), 07 Outubru 2026 — Eskola Ensinu Báziku Sentral (EBC) Dais, Suku Belekasak, Postu Administrativu Maucatar, Munisípiu Covalima, presiza meja no kadeira tan unidade 120 atu suporta prosesu aprendizajen estudante hamutuk 524.
Adjuntu Diretór EBC Dais, Santiago do Nascimento Amaral, hatete katak fasilidade meja no kadeira ne’ebé iha atualmente seidauk sufisiente, tanba estudante balu tenke tur hamutuk rua ka tolu iha kadeira ida no uza kadeira masa durante prosesu aprendizajen.
Tuir nia esplikasaun, eskola hato’o ona proposta ba Ministériu Edukasaun desde tinan 2024 atu hetan apoiu ba meja no kadeira, maibé to’o agora seidauk hetan resposta.
“Ami hato’o ona proposta, liuhusi verbal no eskrita, maibé to’o agora seidauk hetan resposta. Agora ami uza alternativa temporáriu hodi responde ba nesesidade urgente, uza kadeira masa,” dehan Santiago ba jornalista sira iha EBC Dais.
Nia hatete mós katak parte husi meja no kadeira ne’ebé iha ona aat, nune’e eskola presiza unidade 120 tan atu atende nesesidade estudante sira.
EBC Dais iha sala aula hamutuk sia, ho estudante 524 husi klase 1 to’o klase 9. Aleinde problema mobiliáriu, kondisaun infraestrutura eskola mós seidauk di’ak, inklui plafon, odamatan no janela.
Preparasaun ba Exame Nasionál
Ba preparasaun Exame Nasionál, Santiago hatete katak eskola sei hili no rekolla meja no kadeira ne’ebé sei di’ak atu uza hodi atende estudante 83 ne’ebé sei partisipa iha exame.
EBC Dais Mós Falta Profesór
Aleinde falta mobiliáriu, EBC Dais enfrenta mós problema falta profesór.
Tuir Santiago, eskola atualmente iha profesór 21, inklui asistente ida no guarda ida, maibé presiza tan profesór haat atu suporta prosesu aprendizajen iha sentru no eskola filial tolu.
Nia hatete katak proposta kona-ba nesesidade profesór haat submete ona ba Ministériu Edukasaun.
Estudante Husu Muda Menu Merenda Eskolar
Iha parte seluk, estudante EBC Dais, João Lorenso Amaral Bareto, klase 8, hato’o mós preokupasaun kona-ba menu merenda eskolar, liuliu sasoro ne’ebé, tuir nia, la gosta husi estudante barak.
Nia husu atu muda menu sasoro ba menu seluk, hanesan etu ho modo, manutolun ka naan, tanba estudante sira sente katak menu sasoro la atrai.
“Ami la gosta han sasoro. Ami hakarak etu ho modo, tanba estudante sira maioria bo’ot ona,” dehan João.
Santiago hatete katak preokupasaun estudante sira kona-ba menu sasoro relata ona ba parte implementadora no Munisípiu, maibé to’o agora seidauk iha mudansa.
Bazeia ba dadus EBC Dais, eskola ne’e iha estudante hamutuk 524, sala aula sia no profesór 21, ne’ebé fahe iha agrupamentu haat.
Jornalista: Paul Mandeu
