Covalima (RCCT), 06 Outubru 2026 — Autoridade Munisípiu Covalima (AMC) realiza atividade formasaun ba feto potensial sira iha Munisípiu Covalima, ho objetivu atu hametin kapasidade lideransa no prepara feto sira atu partisipa ativu iha prosesu desentralizasaun no poder lokál.
Formasaun ne’e mos sai nu’udar preparasaun ba feto sira atu bele partisipa iha prosesu polítiku no administrativu iha nivel lokál, inklui eleisaun Kamara Munisípal ne’ebé previstu atu realiza iha tinan oin.
Prezidente Autoridade Munisípiu Covalima (PAM), Miguel Armada Cardoso, hatete katak formasaun ne’e foka ba feto potensial sira iha Munisípiu Covalima, liuliu kona-ba desentralizasaun, poder lokál no preparasaun lideransa.
“Formasaun ida-ne’e foka liu ba feto potensial iha Covalima. Bainhira feto potensial sira hetan formasaun kona-ba desentralizasaun no poder lokál, sira bele hamriik no prontu atu lidera.
Entaun, formasaun ne’e ita foka ba sira atu prepara sira-nia an hodi simu desentralizasaun ne’ebé iha tempu badak liu husi prosesu ida. Atu bele, Munisípiu Covalima mos bele kompete bainhira hetan oportunidade.
Desizaun husi Konsellu Ministru hatudu katak Covalima tama. Entaun, feto potensial Covalima prontu ona atu lidera no bele kompete ho mane sira,” hatete Miguel Armada Cardoso.
Atividade ne’e hetan apresiasaun husi partisipante sira, ne’ebé konsidera formasaun ne’e importante atu hasa’e no hametin kapasidade feto iha área lideransa no partisipasaun públika.
Partisipante, Alda de Fátima, apresia inisiativa Autoridade Munisípiu Covalima no konsidera formasaun ne’e importante ba feto sira ne’ebé iha interese atu lidera.
“Formasaun ida-ne’e importante tebes mai ami nu’udar lider. Bainhira atu lidera, ho formasaun sira-ne’e, se karik povu fó fiar, ami feto mos prontu atu lidera,” hatete Alda de Fátima.
Formasaun ne’e aborda tópiku sira kona-ba abordajen jéneru, lideransa feto no desentralizasaun poder lokál.
Jornalista: J. Correia
Editor: Paul Mandeu
