Covalima (RCCT), 05 Novembru 2026 — Servisu Informasaun Polisia (SIP) PNTL Munisípiu Covalima prende bebidas Coca-Cola kaixa hamutuk 66 iha área Busa Kukun, ne’ebé deteta iha laran bis Bolgue ho númeru matríkula 36834, ne’ebé lori pasajeiru husi Covalima ba Díli, iha tuku 04:00 dadeer.
Komandante PNTL Munisípiu Covalima, Superintendente-Xefe Polísia Paulino Carmo Ferreira, informa katak bebidas Coca-Cola kaixa 66 ne’e deteta durante operasaun verifikasaun ne’ebé membru PNTL hala’o iha Bus laran.
Nia hatutan katak, bainhira membru PNTL halo verifikasaun, sira deteta bebidas hirak ne’e, ne’ebé konsidera hanesan sasán bandu, no deside prende atu halo prosesu tuir prosedimentu legál.
“Ita nia servisu deteta bebidas Coca-Cola kaixa 66 iha Bus laran. Depois ita deteta katak sasán sira ne’e kontra bandu, entaun sira prende no lori mai hau atu halo identifikasaun iha Komandu PNTL,” nia esplika.
Komandante PNTL Covalima kontinua hateten katak sasán hirak ne’e agora daudaun asegura hela iha Komandu PNTL Munisípiu Covalima, enkuantu ema sira ne’ebé envolve iha kazu ne’e sei hala’o prosesu identifikasaun.
“Agora sasán sira ne’e iha Komandu Munisípiu Covalima asegura hela, no ema sira mos halo hela identifikasaun. Depois aban ita sei aprezenta ba Ministériu Públiku,” Xefe Polísia Covalima hatutan.
Nia mós informa katak prosesu identifikasaun ba ema sira ne’ebé envolve iha kazu ne’e sei kontinua, antes autoridade kompetente aprezenta sira ba Ministériu Públiku atu halo prosesu tuir lei.
Kazu ne’e sei kontinua iha akompañamentu autoridade kompetente, enkuantu bebidas ne’ebé prende hela sei rai iha Komandu PNTL Munisípiu Covalima.
Jornalista: Olinda Pereira
Editor: Paul Mandeu
