Covalima (RCCT), 05 Novembru 2026 — Diretór Servisu Munisipál Diresaun Transporte no Komunikasaun (SMDTK) Munisípiu Covalima, Joaquín Gusmão, rekoñese katak tinta iha sinais tránzitu Zebra Cross iha Munisípiu Covalima nakfera ona. Maski nune’e, nia informa katak SMDTK hato’o ona karta ba Diresaun Nasionál atu haree no rezolve problema ne’e.
Joaquín Gusmão esplika katak, tuir prosedimentu tékniku, servisu atu hadi’a no instala sinais tránzitu tenke hala’o husi tékniku Diresaun Nasionál. Maibé, tanba prosesu hein apoiu husi Diresaun Nasionál kleur, SMDTK hamutuk ho Jestaun Merkadu no Obras Públikas deside atu halo servisu ne’e ho inisiativa rasik.
Nia afirma katak ekipa sira foti sinais tránzitu ne’ebé estraga, pinta fali no prepara atu instala iha fatin apropriadu.
“Ami rekoñese katak mos hotu ona tinta sira ne’e, maibé ami mos halo karta ba Diresaun Nasionál atu haree asuntu ida ne’e. Maibé sira mos la preokupa tanba ne’e tékniku, la’ós ita mak halo, sira mak tenke mai halo. Hanesan iha merkadu ne’ebá mos sira mak tenke mai monta. Duke ita hein sira, entaun kleur. Tanba ne’e mak Obras, Jestaun Merkadu hamutuk ho ami haree ba sinais sira ne’ebé aat, ema sobu sira ne’e, ami foti hodi mai iha ne’e no ami mak pinta rasik,” nia afirma.
Nia hatutan katak SMDTK Munisípiu Covalima uza métodu manual atu instala fali sinais tránzitu iha Merkadu Covalima, ho objetivu atu organiza movimentu veíkulu no hamenus engarrafamentu iha área merkadu.
“Ne’e ami halo manual, mak hodi monta iha merkadu ne’ebá. Se ita hein Nasionál de’it, entaun kleur liu. Tanba ne’e, ami mak halo rasik hodi monta atu nune’e hodi hamenus engarrafamentu,” nia hatutan.
Iha parte seluk, Joaquín Gusmão la promete atu kontinua hadi’a sinais tránzitu Zebra Cross sira iha Munisípiu Covalima, tanba tuir nia, prosesu ne’e tenke liu husi tenderizasaun no kompeténsia téknika Diresaun Nasionál.
“Atu halo ne’e, ha’u la bele promete, tanba buat ne’e hotu tenke liu husi tenderizasaun. Ita la bele hanoin halo de’it, maibé ami hato’o ba Nasionál tanba sira mak tékniku,” nia afirma.
Jornalista: J. Correis
Editor: Paul Mandeu
