Covalima (RCCT) 04 Novembru 2026—Mate-isin vítima omisídiu ne’ebé akontese iha Rai Mea, Postu Administrativu Zumalai, Munisípiu Covalima, to’o agora sei rai hela iha Sala Mortuáriu Hospital Nasional Guido Valadares (HNGV), Dili, hodi hein prosesu outópsia.
Kazu ne’e rejista ho númeru NUC: 0020/26C/ZML, Kazu ne’e akontese iha loron 31 Outubru 2026, oras 19:00 kalan, ne’ebé rezulta ema ida lakon vida. Prosesu investigasaun kona-ba kazu ne’e kontinua hala’o hela.
Xuperintendente Xefe PNTL, Paulino do Carmo Pereira, informa katak, hafoin akontesimentu, ekipa seguransa Zumalai hamutuk ho ekipa Investigasaun Kriminál Munisípiu Covalima no ekipa Batalhaun Ordem Públika (BOP) ne’ebé destaka iha Covalima, halo kedas asaun iha fatin akontesimentu.
Ekipa sira halo seguransa iha fatin krime, hodi fasilita prosesu investigasaun no identifika ema ne’ebé suspeitu envolve iha kazu ne’e.
Tuir informasaun ne’ebé hetan, suspeitu ida ne’e konsege identifika no agora dadaun hela iha Komandu PNTL Munisípiu Covalima, hodi hein prosesu investigasaun no asaun tuir lei.
Xuperintendente Xefe ne’e mós informa katak mate-isin vítima sei rai hela iha Sala Mortuáriu HNGV, Dili, tanba hein médiku patolojista sira atu hala’o prosesu outópsia, ne’ebé importante atu determina kauza mate no suporta investigasaun kona-ba kazu ne’e.
Tuir informasaun ne’ebé RCCT asesu, mate-isin vítima sei rai hela iha HNGV husi loron 31 Outubru to’o loron 4 Novembru 2026, tanba prosesu outópsia seidauk hala’o, inklui tanba feriadu.
Informasaun ne’ebé hetan hatudu katak prosesu outópsia sei hala’o iha aban dadeer, loron 5 Novembru 2026.
Suspeitu agora dadaun hela iha Komandu PNTL Munisípiu Covalima, hodi hein prosesu investigasaun no prosedimentu tuir mai husi Ministériu Públiku.
Jornalista: Olinda Pereira
Editor: Paul Mandeu
