Covalima (RCCT), 04 Outubru 2026 — Diretur Servisu Munisipál Diresaun Transporte no Komunikasaun (SMDTK) Munisípiu Covalima, Joaquín Gusmão, informa katak instalasaun sinais tránzitu iha Merkadu Tuaderek, Postu Administrativu Suai Vila, atu hamenus engarrafamentu no organiza movimentu veíkulu sira iha área merkadu.
“Sinais ne’ebé mak ami monta iha Merkadu Tuaderek ne’e, atu hamenus engarrafamentu,” nia informa.
Joaquín Gusmão hatutan katak instalasaun sinais tránzitu sira-ne’e hala’o hamutuk ho Diretór Obras Públikas no Jestaun Merkadu. Ema na’in haat mak envolve iha prosesu instalasaun ne’e, ho monta kuadru sinais na’in haat, rua iha parte karuk no rua iha parte kuana, atu informa motorista sira kona-ba fatin ne’ebé labele para.
“Iha altura ne’ebá, ami tau sinais ne’e la’ós ami DNTT mesak, maibé hamutuk ho Diretór Obras Públikas no Jestaun Merkadu, ami na’in haat mak monta sinais ne’e. Objetivu atu komunidade sira ne’ebé fa’an sasán iha merkadu bele hatene no atu hamenus engarrafamentu. Tanba ne’e, ami monta sinais bandu parkir, iha parte karuk kuadru rua no iha parte kuana kuadru rua, ne’ebé hatudu katak labele para iha fatin hirak-ne’e,” nia hatutan.
Nia esplika katak, hafoin instalasaun sinais hotu, autoridade sira fó avizu ba komunidade iha loron Sesta no Sábadu. Durante fulan ida, DNTT hamutuk ho Tránzitu no Jestaun Merkadu sei kontinua kontrola no orienta motorista sira atu kumpre dalan no regra movimentu ne’ebé determina ona.
“Depois ami monta hotu sinais ne’e, ami fó avizu iha Sesta no Sábadu. Ha’u rasik mós fó avizu iha igreja. Depois, ami hamutuk ho Tránzitu no Jestaun Merkadu, iha Sesta no Sábadu, hamrik iha ne’ebá hodi kontrola durante fulan ida no orienta motorista sira atu tuir dalan ne’ebé determina ona. Sira tenke liu iha fatin ne’ebé permite, labele tama iha fatin ne’ebé bandu, no labele para iha estrada boot. Se atu sai, tenke sai liuhusi fatin ne’ebé determina ona,” nia hatutan.
Joaquín Gusmão esplika katak kompeténsia DNTT mak instala sinais tránzitu atu hamenus engarrafamentu, enkuantu autoridade Tránzitu mak iha responsabilidade atu aplika sansaun ba motorista sira ne’ebé viola regra tránzitu.
“Diresaun Transporte nia kompeténsia atu tau sinais sira-ne’e hodi hamenus engarrafamentu. Maibé motorista ka kondutór sira ne’ebé kondús motór no kareta kontra sinais ne’e, kompeténsia Tránzitu nian atu fó tikete infrasaun ba sira, atu nune’e sira bele muda hahalok ne’ebé mak sira halo,” nia esplika.
Iha oportunidade ne’e, nia husu motorista no kondutór sira atu kumpre sinais tránzitu ne’ebé instala ona, hodi ajuda mantein orden no seguranza ba movimentu veíkulu sira iha Merkadu Tuaderek.
Merkadu Tuaderek lokaliza iha Aldeia Tuaderek, Suku Camanasa, Postu Administrativu Suai Vila, Munisípiu Covalima.
Jornalista: J. Correia
Editor: Paul Mandeu
