COVALIMA (RCCT), 28 Outubru 2026 — Komunidade Maligirik, iha Suku Oges, Postu Administrativu Maucatar, Munisípiu Covalima, to’o agora kontinua enfrenta difikuldade asesu ba bee-moos. Tanba ne’e, komunidade sira obriga buka no ke’e bee iha mota atu uza ba nesesidade loroloron, inklui hemu, hariis no uza iha sentina.
Estudante Saza Aquilas Marçal lamenta situasaun ne’e, tanba komunidade seidauk hetan asesu ba bee-moos no depende ba bee mota atu satisfás nesesidade loroloron.
“Udan para halo bee-moos tia mak foin kuru bee-moos. Ami hariis iha ne’e de’it. Bainhira udan, mota tun lori rai mai taka tia ami ke’e fila fali. Agradece tanba iha bailoro bee la maran. Bainhira maran, ami ba kuru fali iha mota leten. Ami hemu bee mota de’it. Bee ida ne’e ba hariis, ba sentina, bee hemu mak sorin ne’ebá,” informa Saza Aquilas Marçal.
Komunidade Maligirik, Jaçinta Luçia, esplika katak problema asesu ba bee-moos ne’e kleur ona. Nia hateten katak, depois sistema distribuisaun bee ne’ebé uluk fornese bee ba komunidade estraga, komunidade hahú buka solusaun rasik liuhusi ke’e bee-matan iha mota nia ninin.
“Tinan barak ona, komesa 2009. Uluk 2007 no 2008 ne’e, ema dada bee husi Lak Hirik hun mai tia ida ne’e ami hemu. Ema deskoñesidu balu hasai tia besi sira, pipa sira estraga hotu. Entaun, ami la hetan ona bee-moos to’o 2009. Ami buka fali mota no ami ke’e fali bee-matan hodi hemu to’o agora.
“Ami buka nafatin bee rai ne’ebé bokon, entaun ami ke’e ida ne’e hodi haree bee se iha. Entaun, ami hamoos tia, ami hemu nafatin bee mota. Ami ke’e iha mota ninin, mota suli iha mota laran. Ami buka bee-moos iha mota ninin.
“Ami hato’o ba Governu tanba bainhira tempu udan boot, mota sa’e tia, ami buka bee araska,” informa Jaçinta Luçia.
Hatan ba preokupasaun komunidade nian, Diretór BTL, EP Munisípiu Covalima, Sipriano Amaral Soares, informa katak área balu iha Suku Oges no Suku Debos kontinua enfrenta problema asesu ba bee-moos. Nia hateten katak ekipa tékniku BTL, EP nível nasionál halo ona levantamentu dadus, no tuir planu, programa bee-moos sei implementa iha tinan 2027.
“Parte Suku Oges iha aldeia sira hanesan Baulela, Orun, Foho Rua, inklui mos Suku Debos nian, hanesan iha Aldeia Lokeu, aldeia hirak ne’e sei iha problema ba bee-moos. Tanba ne’e mak ami husi ekipa tékniku BTL, EP nasionál halo ona levantamentu dadus ba Suku Oges, ne’ebé tuir planu, iha tinan 2027 sei realiza implementasaun programa bee-moos iha parte Oges ne’e, inklui mos Maligirik ne’ebé to’o agora seidauk asesu ba bee-moos,” nia informa.
Sipriano Amaral Soares hatutan katak problema ne’e mos kauza husi sistema distribuisaun bee ne’ebé la funsiona ho di’ak, inklui grupu maneja fasilidade bee-moos ne’ebé la hala’o sira-nia responsabilidade ho di’ak.
“Kauza primeiru ne’e, bee ne’ebé mai husi Intek Ameriku ne’e sistema boot. Depois, durante ne’e iha grupu maneja fasilidade bee-moos mak foti responsabilidade iha fatin ne’ebá, maibé grupu sira ne’e la funsiona ho di’ak. Tanba ne’e mak iha problema kanu transmisaun kotu, bee la bele asesu fila fali mai to’o iha parte Oges. Ne’e mak halo komunidade sira la asesu ho di’ak to’o agora,” nia esplika.
Nia akresenta katak sei kontinua kordena ho BTL, EP nível nasionál atu buka posibilidade implementa programa bee-moos iha Suku Oges iha tinan oin, tanba área ne’e tama iha zona urbana Suai Vila.
“Ha’u sei nafatin kordena ho BTL, EP nível nasionál, para Suku Oges ne’e bele iha posibilidade ita implementa tanba Suku Oges ne’e tama área urbana Suai Vila nian. Agora dadaun sira krize ba bee-moos, tanba ne’e mak ha’u nafatin esforsu kordena ho nível nasionál oinsá mak ita bele ezekuta programa bee-moos iha tinan oin,” nia afirma.
Dadus populasaun Suku Oges
Suku Oges iha família uma-kain hamutuk 842, ho populasaun total ema na’in 3.402, kompostu husi feto na’in 1.681 no mane na’in 1.721. Dadus ne’e inklui komunidade Maligirik.
Jornalista: J. Correia
Editór: Paul Mandeu
