Covalima (RCCT), 07 Outubru 2026 — Sekretariadu Estadu Dezenvolvimentu Lokál (SEDL) realiza lansamentu atividade Recensiamentu Eleitoral iha Postu Administrativu Tilomar, Munisípiu Covalima, ho objetivu atu hakbesik servisu eleitoral ba komunidade.
Atividade ne’e nu’udar parte husi esforsu institusionál atu asegura katak sidadaun sira ne’ebé kumpri ona kondisaun legal ba eleitor bele rejista no hetan asesu ba prosesu eleitoral.
Recensiamentu Eleitoral importante atu atualiza no konfirma dadus eleitor sira, inklui rejistu sidadaun foun ne’ebé iha direitu atu vota, no halo verifikasaun ba informasaun eleitoral existente iha Postu Administrativu Tilomar.
Administrador Postu Administrativu Tilomar, Venancio Sarmento, hato’o apresiasaun ba IX Governu Konstitusionál tanba lansa ona atendimentu eleitoral iha nivel postu, ne’ebé, tuir nia, bele hafasil komunidade atu trata dokumentasaun no prosesu eleitoral.
“Ami sente orgullu tebes tanba IX Governu, liu husi ESTAE, halo lansamentu Recensiamentu Eleitoral iha postu sira no hafasil ona ami nia komunidade atu trata eleitoral, tanba durante ne’e ami nia komunidade sira hasoru difikuldade tebes atu trata recensiamentu eleitoral biométrika,” Nia haktuir.
Iha lansamentu ne’e, SEDL, Mateus W. dos Santos Tallo, apela ba komunidade iha Postu Administrativu Tilomar atu partisipa ativu iha prosesu recensiamentu, liu husi fó informasaun loos no kompletu tuir prosedimentu ne’ebé determina.
“Ohin ita ofisializa loke Recensiamentu Eleitoral Biométrika iha Postu Administrativu Tilomar, simbolikamente iha Munisípiu Covalima. Dadus iha Munisípiu Covalima sei menus tanba dadus balun ne’ebé ha’u hetan liu husi ESTAE. Ho ida ne’e, Recensiamentu Eleitoral sei hakbesik liután ba komunidade sira,” Mateus W. dos Santos Tallo relata.
Prosesu recensiamentu ne’e mos espera bele ajuda hametin partisipasaun sidadaun iha prosesu demokrátiku, liuliu iha preparasaun ba eleisaun sira iha futuru.
SEDL enkoraja komunidade atu aproveita oportunidade ne’e hodi asegura katak sira nia dadus eleitorál rejistadu no atualizadu, nune’e sira bele ejerse direitu siviku tuir lei.
SEDL mos husu ba autoridade eleitoral atu kontinua halo servisu recensiamentu tuir planu, ho atensaun ba dadus eleitorál atu asegura prosesu rejistu ne’ebé ordenadu no atualizadu.
Atendimentu Recensiamentu Eleitoral iha Postu Administrativu Tilomar hahú iha 07 Outubru 2026 no sei termina iha fulan Janeiru 2027.
Jornalista: Paul Mandeu
