Covalima (RCCT), 05 Outubru 2026 — Servisu Edukasaun Munisípiu Covalima simu ona lista profesór hamutuk na’in-37 ne’ebé sei tama iha reforma obrigatóriu iha tinan 2027.
Diretora Edukasaun Munisípiu Covalima, Elda de Fatima, deklara katak bazeia ba dadus profesór sira ne’ebé tama iha lista reforma obrigatóriu, Servisu Edukasaun Munisípiu relata ona situasaun ne’e ba Ministériu Edukasaun.
Nia hatete, iha tinan 2026, profesór na’in-26 hahú ona reforma, no iha tinan 2027 sei aumenta tan profesór na’in-37 ne’ebé sei tama iha reforma obrigatóriu.
Tanba ne’e, nia husu Ministériu Edukasaun atu kontinua koloka profesór foun hodi responde ba nesesidade profesór no hadi’a servisu edukasaun iha Munisípiu Covalima.
“Atu troka sira ne’e sei da’uk, tanba bolsa kandidatu ne’e hotu ona. Ami nia pedidu dadauk ne’e ami rekolla hela husi eskola sira, depois ami hato’o pedidu ne’e ba Nasional. Maibé durante ne’e, ami nia pedidu antes iha tinan kotuk mos ami hato’o ba Nasional sira, koloka hotu ona profesór mai. Maibé profesór la to’o nafatin ho profesór sira ne’ebé menus, moras, permanente mate. Tanba ne’e, ami sei menus profesór atus ida resin, no ba tinan oin profesór 30 resin mak atu reforma,” Elda de Fatima deklara.
Enkuantu, Koordenadór Eskola Sekundária Jerál Públika Filial Salele, Daniel Cardoso, hatete katak iha eskola ne’e mos iha profesór ida ne’ebé tama iha lista reforma obrigatóriu no sei reforma iha tinan 2027.
Tanba ne’e, nia husu ba Servisu Edukasaun Munisípiu atu koloka tan profesór ba disiplina Matemátika no Portugés iha Eskola Sekundária Jerál Públika Filial Salele, hodi reforsa kualidade no kontinuidade prosesu aprendizajen iha eskola ne’e.
“Profesór iha Eskola ESGP Filial Salele mahutuk na’in-25, profesór permanente na’in-12 no profesór bolsa kandidatu na’in-13. Iha profesór permanente ida mak iha tinan 2027 tama ona reforma. Nia lori disiplina rua, Matemátika ho Portugés. Atu troka nia, ita sei dauk iha profesór ne’ebé oinsá. Tanba ne’e, ami husu Ministériu atu ajuda substitui nia fatin ne’ebé hetan ona reforma,” Daniel Cardoso hatete.
Bazeia ba dadus husi Servisu Edukasaun Munisípiu Covalima, totál profesór iha Munisípiu Covalima hamutuk na’in-1.037, kompostu husi profesór permanente na’in-887, bolsa kandidatu na’in-131 no profesór kontratadu na’in-19.
Jornalista: J. Correia
Editor: Paul Mandeu
