Covalima (RCCT), 01-10-2026 — Associação Escola da Língua Japonesa MIRAI SAT no Associação AMAHORO loke torneiu desportivu taxa rotativu Amahoro Cup 2026 ba dala III, iha Kampu Futebol Maudemó, Salele, Postu Administrativu Tilomar, Munisípiu Covalima, ho objetivu atu dezenvolve talentu foin-sa’e sira iha área desportu no promove moris saudável liuhusi ambiente ne’ebé moos.
Eventu ne’e hala’o ho tema “Promove hodi dezenvolve talentu iha área desportu no kontribui ba moris saudável liuhusi ambiente ne’ebé moos.”
Amahoro Cup 2026 inklui modalidade futebol mane U-14, ho partisipasaun klubu 10, no modalidade voleibol feto, ne’ebé tuir organizadór la aplika limitasaun idade ba partisipante sira.
Responsável taxa rotativu Amahoro Cup 2026, José Quintão Amaral, hatete katak torneiu ne’e sai plataforma atu fó oportunidade ba foin-sa’e no feto sira hodi dezenvolve sira-nia talentu, liuliu iha área desportu.
Nia esplika katak torneiu ne’e hetan apoiu husi Associação Escola da Língua Japonesa MIRAI SAT no Associação AMAHORO.
Tuir nia informasaun, iha períodu 2024 to’o 2025, torneiu ne’e hetan apoiu ho montante osan hamutuk US$1.000 resin, no iha tinan 2026 hetan apoiu orsamentál hamutuk US$1.100.
“Torneiu ida ita loke tanba hetan apoiu husi Associação Escola da Língua Japonesa MIRAI SAT ho Associação AMAHORO, hahú husi 2024 to’o 2026. Agora ita hala’o taxa rotativu ne’e ba dala III ona, no orsamentu hotu-hotu hetan apoiu husi asosiasaun rua ne’e ho montante US$1.100 ba atividade desportiva Amahoro Cup 2026,” José Quintão Amaral informa.
José Quintão Amaral hatutan katak komisaun organizadora identifika klubu hamutuk 15 ba modalidade futebol, maibé klubu lima la konsege partisipa tanba parte ofisiál sira ne’ebé kontaktadu la fó resposta favorável.
Enkuantu modalidade voleibol feto, organizadór identifika klubu hamutuk 7, maibé klubu 5 mak konklui partisipasaun. Organizadór sei fó oportunidade ba klubu sira ne’ebé la partisipa atu kompete iha edisaun Amahoro Cup 2027.
“Lolos ne’e klubu hamutuk 15 ne’ebé ekipa husi komisaun organizadora identifika, maibé to’o iha faze identifikasaun, klubu lima seluk ita la konsege identifika tanba ita kontaktu parte ofisiál sira la fó resposta ne’ebé pozitiva ba ita. Tanba ne’e, ita hela klubu sira ne’e no sira sei kompete fali iha 2027. Ho ida ne’e, klubu ne’ebé konklui hamutuk klubu 10 iha modalidade futebol U-14. Modalidade voleibol feto identifika klubu hamutuk 7, maibé klubu 5 mak konklui, ne’ebé agora kompete hela iha taxa rotativu Amahoro Cup 2026 ba dala III,” José Quintão Amaral hatutan.
Iha tempu hanesan, Komandante PNTL Eskuadra Postu Administrativu Tilomar, Arcanjio Doutel Sarmento, iha nia diskursu hatete katak PNTL sei kontinua akompaña atividade desportiva ne’e no garante seguransa ba partisipante sira.
“Hanesan seguransa, ami nafatin akompaña ita-boot sira, ami garante problema la iha. La hanesan fulan hirak liu ba ne’e, imi-nia maun sira husi klubu lubuk ida mai joga iha ne’e mosu problema ki’ik-oan, maibé ida ne’e husi parte seguransa nia haree katak la iha problema. Di’ak ba imi, no iha imi-nia jogu ida ne’e labele iha problema. Ami parte seguransa nafatin asegura ita-boot sira,” Arcanjio Doutel Sarmento hatete.
Iha jogu dahuluk taxa rotativu Amahoro Cup 2026, Klubu UNJOCA konsege manán hasoru Klubu ONU LARAN ho rezultadu 2–1.
Jornalista: Julião Correia
Editor: Paul Mandeu
