COVALIMA (RCCT), 24 Setembru 2026 – Asosiasaun HAK husu ba Defensor Publiku sira atu atende kazu no rekursu legal husi kliente sira ho seriedade no atensaun máximu, atu garante asesu ba justisa ne’ebé justu no transparente.
Diretor Ezekutivu Asosiasaun HAK, Feliciano da Costa Araujo, kestiona atendimentu Defensor Publiku ba kliente sira ne’ebé hetan akuzasaun husi Ministériu Públiku no lori ba Tribunal. Tuir nia, kazu sira ne’e presiza hetan akompañamentu jurídiku ne’ebé di’ak antes Tribunal fó desizaun ka kondenasaun.
“Ami mos faz parte rede ba iha prizaun nian ne’ebé kompostu husi MSSI, Defensor Publiku, Ministériu da Justisa, inklui Provedor Direitus Umanus, hamutuk ho organizasaun sosiedade sivíl sira. Ita dala barak diskute no hakarak rekomenda nafatin, liu-liu ba Defensor Publiku, atu toma atensaun ba sira nia defeza,” Feliciano hateten.
Tuir Feliciano, akompañamentu husi Defensor Publiku la’ós de’it iha Tribunal, maibé presiza kontinua to’o iha prizaun, liu-liu bainhira prizioneiru sira hato’o reklamasaun ka iha nesesidade jurídika.
“Ami nia hanoin, akompañamentu la bele to’o iha Tribunal de’it. Mais ou menus, bainhira sira lori reklamasaun ida tama mai iha prizaun ka kumpri sira nia pena, sira bele akompaña atu entrega no hatene sira nia situasaun. Akompañamentu ne’e la’ós de’it iha Tribunal,” nia haktuir.
Feliciano mos husu atu Defensor Publiku halo vizita ne’ebé regular ba prizaun, la’ós de’it vizita pontuál, atu bele rona diretamente kondisaun no nesesidade prizioneiru sira.
“Vizita la’ós vizita regular, maibé tinan ida ne’e, oinsá mak ita boot sira vizita sira hodi husu sira nia kondisaun no saida mak sira presiza atu tulun, liu-liu ba ita nia maluk sira iha Prizaun Preventiva, atu nune’e sira bele hatene to’o bainhira loos mak desizaun definitivu sei to’o ba sira,” Feliciano dehan.
Nia hateten katak, Asosiasaun HAK sempre rekomenda ba Defensor Publiku atu tetu no haree ho atensaun ba kazu prizioneiru sira, liu-liu sira ne’ebé hela iha Prizaun Preventiva no hein desizaun definitivu.
Iha parte seluk, Diretor Ezekutivu Asosiasaun HAK mos fó espetativa ba Defensor Publiku sira atu jere sira nia rekursu ho di’ak, hodi bele aumenta qualidade atendimentu ba komunidade.
“Ami nia espetativa boot ida mak, se Defensor Publiku dala ruma ko’alia dehan falta rekursu, entaun ami nia espetativa ba oin ne’e, tanba sira sai ona orgaun ida independente depois de tinan naruk hamutuk ho Ministériu da Justisa, hodi fó dekretu-lei ida ba sira iha kompeténsia atu jere sira nia rekursu rasik,” Feliciano relata.
Nia subliña katak, ho papel independente no kompeténsia ne’ebé iha, Defensor Publiku tenke tau atensaun máximu ba sira nia servisu.
“Defensor Publiku tenke tau atensaun máximu tanba imi nia papel ne’e forte tebes atu garante justisa ida ne’ebé klaru no justu ba ita nia maluk sira,” nia afirma.
Deklarasaun hirak ne’e hato’o husi Diretor Ezekutivu Asosiasaun HAK ba jornalista sira iha Prizaun Suai, durante atividade sensibilizasaun kona-ba lei no direitus umanus ba prizioneiru no guarda prizional sira, ne’ebé organiza husi Asosiasaun HAK.
Jornalista: Paul Mandeu
