Covalima (RCCT), 22 Setembru 2026 – Sekretariadu Tékniku Administrasaun Eleitorál (STAE) Munisípiu Covalima destroi materiál eleisaun sensível no la sensível ne’ebé uza ona iha Eleisaun Prezidensiál no Parlamentár tinan 2022 no 2023. Prosesu destruisaun ne’e hala’o iha Haemanu, Suku Beko, Postu Administrativu Suai, Munisípiu Covalima.
Diretór STAE Munisípiu Covalima, João Tilman, hateten katak prosesu destruisaun ne’e hala’o atu fó espasu ba armajen, nune’e STAE bele prepara no rai materiál ba Eleisaun Prezidensiál no Parlamentár tuirmai.
Materiál eleisaun ne’ebé destroi inklui boletin votus, tinta no kartaun eleitorál antigu ne’ebé durante ne’e STAE rekolla no rai.
Destruisaun materiál eleisaun ne’e bazeia ba Artigu 68 husi Dekretu Governu Nú. 21/2017 no Artigu 55, númeru 2, husi Dekretu Governu Nú. 2/2017, kona-ba prosedimentu votasaun, kontajen no apuramentu rezultadu.
“Destruisaun ami sunu iha Haemanu, hamutuk ho ekipa CNE no PNTL, hodi asiste hamutuk ba destruisaun sasan sira ne’e. Ami destrui materiál eleisaun no materiál eleitoral antigu sira ne’e atu fó espasu ba armajen, hodi prepara fali materiál foun ba eleisaun 2027,” João Tilman relata.
Iha prosesu destruisaun ne’e, ekipa husi Comisaun Nasionál Eleisaun (CNE), reprezentante partidu polítiku no Polícia Nasionál Timor-Leste (PNTL) partisipa atu asiste no monitoriza prosesu destruisaun materiál eleisaun.
Entretantu, kartaun eleitorál ne’ebé destroi ona kontén dadus eleitorál. Tuir esplikasaun João Tilman, kartaun eleitorál sira ne’e rekolla depois STAE hahú prosesu lansamentu kartaun eleitorál biométriku iha Munisípiu Covalima, hahú husi 30 Outubru 2024 to’o agora.
Jornalista: Paul Mandeu
