Covalima (RCCT), 11 Setembru 2026 — Komandu Polísia Nasionál Timor-Leste (PNTL) Munisípiu Covalima garante seguransa durante realizasaun eventu enduro iha Munisípiu Covalima.
“Ha’u hala’o show of force. Molok hala’o show of force, ha’u hala’o formatura jerál hodi garante seguransa durante realizasaun eventu enduro iha Munisípiu Covalima,” dehan Komandante PNTL Munisípiu Covalima, Superintendente-Xefe Polísia Paulino do Carmo Perreira, ba jornalista sira iha Camenasa.
Atu asegura seguransa durante eventu enduro, PNTL envolve unidade sira, hanesan Unidade Patrulhamento de Fronteira (UPF), Unidade Polísia Maritima (UPM), Companhia de Operações Especiais (COE), Batalhão de Operações Policiais (BOP) no F-FDTL.
Eventu enduro ne’e hanesan eventu nasionál ne’ebé envolve partisipante husi munisípiu hotu, inklui partisipante husi nasaun viziña, Indonézia.
Eventu ne’e iha modalidade oioin, hanesan Enduro Soke Ai Laran, Adventure Trabas no Motor Cross.
Bazeia ba rota Soke Ai Laran, atividade hahú iha Camanasa, tuir mota Karau Ulun, sai iha Ogues, kontinua ba Maligirik, depois sai iha Lo’okeu Foho, tun mai Merkadu no ikus fila fali ba Camanasa.
Atividade Motor Cross no eventu enduro sei hala’o iha Camanasa.
Iha sorin seluk, Prezidente Suai Trail Community (STRAC), Alarico Lay, esplika katak Suai Trail Community organiza eventu ne’e tanba hetan apoiu orsamentu husi Ministériu Juventude, Desportu, Arte no Kultura (MJDAC), hamutuk ho US$7,000.
“STRAC organiza eventu enduro, Motorcross no Adventure Trabas. Partisipante sira ne’ebé hetan pozisaun primeiru to’o terseiru sei simu prémio,” nia esplika.
Bazeia ba alokasaun orsamentu ba manan-na’in sira, eventu enduro iha orsamentu prémio hamutuk US$1,500.
Enkuantu ba kompetisaun Motorcross, orsamentu ba prémio manan-na’in sira hamutuk US$1,650, ho kategoria CSE 250, SE 85, motorizada rakitan CC 200 no motorizada Star, ne’ebé la iha variassaun.
Tuir planu, eventu ne’e sei hala’o durante loron rua, hahú iha 12 Setembru no remata iha 13 Setembru 2026.
Jornalista: Julião Correia
Editor: Paul Mandeu
