Covalima (RCCT) 03-07-25-Kinta ne’e governu liu husi Sekretaria Estadu Floresta (SEF) hala’o konsulta publiku iha Postu Administrativu Zumalai, hodi sensibiliza komunidade sira atu proteje no konserva rekursu naturais liu liu iha area kosteira.
Sekretariu Estadu Floresta, Fernandinho Vieira, hatete governu iha politika atu nafatin toma atensaun hodi asegura area florestal iha timor leste.
“Ba programa ida ne’e hau hanoin ita halo sensibilizasaun konsultasaun ida ne’e oinsa para aumenta konsiensia komunidade para atu bele proteje no floresta iha ita nia nasaun, ita hatene katak nasaun ida kuandu ukun-an tenke ser nia purvolta pursentu 25 to’o pursentu 50 nia rai tenke iha ai laran ne’e konvensaun internasional, maka dehan la’os sekretaria estadu maka dehan, tanba ne’e maka liu husi politika governu da-9 nafatin tau atensaun no prioridade oinsa para bele asegura floresta iha ita nia nasaun Timor-Leste espesial iha Postu Zumalai.” Sekretariu Estadu Floresta Fernandinho Vieira, ko’alia sai iha nia diskursu.
Reprezenta Prezidente Autoridade Munisipal (PAM), atual Diretór Servisu Munisipal Agrikultura Munisipiu Covalima, Lino Mago iha nia intervensaun dehan, iha futuru programa ne’e sei fo vantajen di’ak iha area floresta.
“Hanesan reprezenta PAM Covalima hato’o ba povu tomak katak programa ne’ebé mai husi Sekretaria Estadu Floresta ida ne’e atu fo vantazen ba ita, atu nune’e bele hare ita nia iha Covalima espesifiku iha Zumalai, hare didi’ak atu nune’e buat sira ne’e fo vantazen ba ita nia rai no ita hotu maka kuidadu ita nia riku soin ne’ebé iha, atu nune’e ba oin ita nia nasaun bele hetan vantazen mos husi buat sira ne’e hotu, tanba ne’e husu liliu ba tekniku sira agora daudaun iha munisipiu fabor ida hare buat sira ne’ebé akontese iha baze dala ruma ema ko’a ai ilegal iha fatin-fatin, tan ne’e dala ida tan hanesan reprezenta PAM orienta ba tekniku sira atu hare buat sira ne’e labele akontese iha futuru mai” dehan Lino Magno.
Timor Leste iha Luan area ho total kuaze 14.874 km², tan ne’e persija iha area floresta ho pursentu 25 to’o pursentu 50 hodi salva planeta mundu. Ai laran ka floresta nudar fatin moris ba ema, balada no fatin moris ba ekosistema tasi no ekosstema rai nian.
Jornalista : Julio Salinas
Editor : Chamot Nahac
