Covalima (RCCT), 28-08-2026–Xefi Sentru Saúde Postu Administrativu Fatu-Lulik, Alberto Ferreira Noroña, husu ba Ministériu Saúde atu tau prioridade ba konstrusaun edifísiu Sentru Saúde foun ho espasu ne’ebé luan no naton, tanba edifísiu ne’ebé uza daudaun ne’e nia espasu ki’ik ona.
Alberto Ferreira Noroña hateten katak, kondisaun edifísiu Sentru Saúde ne’ebé iha agora la fó espasu ne’ebé naton ba kuartu servisu no funsionáriu sira, nune’e bele afeta komfortu no qualidade atendimentu ba komunidade.
“Ami nia Sentru Saúde ne’e ho medida ne’ebé ki’ik no kuartu sira la naton ba ami nia kolega sira. Ami husu ba oin se bele halo konstrusaun Sentru Saúde ne’e ho medida ne’ebé boot no naton, ho nune’e bele fó atendimentu ba ami nia komunidade ho di’ak,” Alberto Ferreira Noroña informa.
Iha sorin seluk, kona-ba planu konstrusaun Postu Saúde foun iha Aldeia Fatu-Loro, Alberto Ferreira Noroña informa katak komunidade hatudu ona apoiu ba planu ne’e.
Komunidade iha Aldeia Fatu-Loro integra ona rai ho gratuita ba Ministériu Saúde, ho medida ne’ebé naton ba konstrusaun,” nia akresenta.
Enkuantu ne’e, Diretor Interinu Servisu Saúde Munisipál Covalima, Teofilho Amaral, hateten katak Servisu Saúde Munisipál Covalima kontinua halo esforsu atu asegura kondisaun infraestrutura saúde ne’ebé di’ak, atu nune’e pesoal saúde bele fó atendimentu ne’ebé adekuadu ba komunidade.
“Husi parte Saúde Munisipál, ita nafatin halo esforsu atu buka meius oinsá bele asegura pesoal saúde sira atu halo atendimentu ne’ebé adekuadu, liuliu iha parte infraestrutura saúde nian. Ita mos buka meius oinsá bele halo rekonstrusaun no konstrusaun ba fasilidade sira ne’ebé seidauk tuir padraun ne’ebé iha,” Teofilho Amaral informa.
Tuir informasaun ne’ebé jornalista sira asesu, prosesu preparasaun ba konstrusaun ne’e hahú ona. Kompaña ne’ebé responsavel ba projetu ne’e hahú ona hatun material baze ba konstrusaun, hanesan fatuk, rai-henek no besi beton.
Material sira ne’e hetan apoiu husi Autoridade Munisipál Covalima, liu husi Servisu Saúde Munisipál Covalima no Programa Dezenvolvimentu Munisipál (PDM).
Jornalista: Julião Correia
Editor: Paul Mandeu
