Covalima (RCCT) 09-10-25-Ministru Administrasaun Estatal (MAE) Tomás do Rosário Cabral hatete, Xefe Suku sira mak sai pilar ba konsolidasaun iha baze hodi hametin rekosiliasaun entre timor oan sira nune’e bele kontinua promove relasaun kultura timor nian ho timor osidental (NTT Indonesia).
Governante ne’e deklara lia ne’e iha Munisipiu Covalima wainhira halo abertura ba diologu iha eventu Festival Fronteira 2025 ho tema jeral “Interkambiu Kultural ba Hametin Rekonsiliasaun”.
“Xefe Suku sira tenki sai pilar konsolidasaun iha kraik. Ema hili imi. Halo tuir no kumpri hodi hala’o dever, ita bo’ot sira ema hili, maibe juramentu ne’e ba estadu. Estadu ne’e ida deit, demokrasia mak ita fahe malu, maibe estadu ne’e republika demokratika timor leste” Ministru Administrasaun Estatal (MAE) Tomás do Rosário Cabral hatete.
Membru Governu ne’e mos informa katak estadu rua, Timor Leste no Indonesia iha ona planu atu reativa fali boarding pass hodi fasilita timor oan sira bele halo movimentasaun tama no sai liu husi liña fronteira ho asuntu ida importante liu ne’ebé iha ligasaun ho atividade kultura nian.
“Ko’alia sobre boarding pass, asesu ba mai, ko’alia sobre kultura rai rua ne’e. Asuntu mais importante ligadu ho kultura, boarding pass ne’e bele uja tama/sai rai rua ne’e labele liu 10 kilometrus, se lia ruma karik sira ba karik bele tama deit. Sira mai mos, bele tama deit, maibe ema sira ne’e tenki rejistu online para bele iha dadus iha sorin, dadus iha ne’e, para hatene katak sira ne’e mak bele tama, se iha kultura sira ba deit. Governu rua komesa avansadu ba ida ne’e.” nia dehan.
Ministru Administrasaun Estatal (MAE) Tomás do Rosário Cabral mos dehan, tempu badak governu sei realiza enkontru altu nivel iha fornteira Maliana hamotuk ho delegagasaun sira husi governu Indonesia hodi ko’alia konaba asuntu boarding pass ba sidadaun sira hodi asesu halo movimentasaun tama no sai liu husi fronteira ba asuntu mais importante, liu liu atividade kultura nian.
Reportazen RCCT
