Covalima (RCCT) 30-07-25-Xefe Suku Kamanasa hala’o observasaun ba projeitu Programa Nasional Dezenvolvimentu Suku (PNDS) siklu-7 ne’ebé konstrui drenazen no deker unidade rua ne’ebé implementa iha Aldeia Fatuisin, Suku Kamanasa, Postu Administrativu Suai, atinji ona kuaze pursentu 20.
Xefe Suku Kamanasa, Fernando Noronha, kompromete sei garantia kualidade projetu sei remata tuir kalendariu ne’ebé determinadu.
“Tuir ha’u nia observasaun programa PNDS daudaun ne’e konaba siklu-7 ami implementa iha Aldeia Fatuisin, iha ne’eba tuir observasaun ne’e, besik tama ona ba pursentu 20, maibe ha’u garantia to’o tempu besik bele finaliza lalais tuir durasaun tempu ne’ebé iha, ita hare fila fali konaba trabalador sira nia servisu la’o ho di’ak, no mos bainhira ha’u ba halo monitorizasaun fo hanoin ba iha Ekipa Jestaun Suku (EJS) Suku Kamanasa para tenke aselera ho nune’e bele remata iha tempu besik” Xefe Suku Kamanasa, Fernando Noronha, informa.
Lider Suku Kamenasa ne’e rekomenda ba kompañia ne’ebé manan tenderizasaun projetu konstrusaun drenazen no dekar iha Fatuisin ne’e atu raut lalais rai maten, nune’e labele impede traballador sira nia servisu.
“Ha’u nafatin rekomenda ba kompañia ka fornesedor ho nune’e bele lalais rai maten ne’eba para labele prezudika traballador sira nia servisu, ho nune’e mos badaen sira bele halo servisu hodi book an di’ak, tan ne’e maka nafatin fo hanoin ba iha kompañia” nia haktuir.
Enkuantu projetu konstrusaun drenazen no plat deker unidade rua, iha Aldei Fatuisin ho total orsamentu hamotuk dolar amerikanu rihun rua nulu resin hitu, atus hat tolu nulu resin hitu, sentavus rua ($ 27,437.02), ne’ebé implementa ho duransaun tempu durante fulan tolu, hahu loron 02 Juñu 2025 no remata iha loron 02 Setembru 2025.
Jornalista : Julio Salinas
Editor : Chamot Nahac
