Covalima (RCCT) 21-02-24-Projetu Programa Nasional Dezenvolvimentu Suku (PNDS) Uma Naroman ba Povu (UNP) faze primeiru 2021 nian ne’ebé implementa iha Aldeia Lorokida, Suku Fohorem, Postu Administrativu Fohorem to’o agora seidauk finaliza maibe oitavu governu inagura ona iha tinan 2022.
Nune’e Xefe Aldeia Lorokida Melkiano do Rego, sente triste tanba governu inaugura ona UNP ne’e maibe PNDS rasik demora Finasaun ba konstrusaun to’o benefisiariu mos la goja apoiu ne’ebé governu fo tanba uma na’in mate ona.
“Ha’u sente triste tanba implementasaun Uma Naroman ba Povu (UNP) iha Aldeia Lorokida ho tempu naruk, no benefisariu labele hela ona ba uma refere tanba fila hikas ona ba aman maromak, kondisaun uma dehan remata ona, maibe tuir ami nia haree seidauk remata, rangka seidauk iha, plafon mos tau seidauk hotu, plester (reboka) mos seidauk hotu, tuir ami nia haree implementasaun laiha kualidade no laiha kontrola husi funsionariu PNDS ne’ebé destakadu iha Postu Administrativu Fohorem, uma PNDS tolu seidauk remata hahu 2021 to’o 2023 mos seidauk remata, iha 2021 tama ba iha 2022 uma PNDS tolu iha ami nia Aldeia Lorokida seidauk remata maibe sira inagura ona, tanba saida maka uma seidauk hotu bele halo inagurasaun ona funsionariu PNDS sira ne’e atu halo saida, ema rekruta sira ne’e ba atu halo saida tuur deit to’o fulan ba simu osan, funsionariu PNDS la hala’o sira nia kna’ar hodi tun ba iha baze sira hala’o sira nia kna’ar iha postu de’it baze sira la ba” informa Xefe Aldeia Lorokida Melgiano do Rego ba jornalista sira iha Sede Suku Fohorem foin lalais ne’e.
Sorin seluk tuir Eis Xefe Suku Fohorem hanesan mos Veteranu, Fernando Fereirra, observa programa PNDS ne’ebé implementa iha Postu Fohorem iha suku 4 mai ho tipu rua hanesan PDNS reguler ho UNP projetu sira ne’e hetan ona inagurasaun iha 2022 maibe to’o 2024 konstrusaun seidauk finaliza hodi bele entrega ba benefisariu sira, pior liu mak benefisariu ida iha Lorokida mate ona.
“Ha’u hanesan veteranu no mos hanesan eis xefe suku durante ne’e tuir hau nia observasaun katak programa PNDS ne’ebé implementa iha Postu Administrativu Fohorem la’o tinan barak ona, tan ne’e hakarak informa ba publiku katak programa PNDS iha parte rua, ida maka reguler no ida seluk maka Uma Naroman ba Povu (UNP), UNP implementa iha Postu Fohorem iha suku 4 reguler mos hanesan, programa rua ne’e iha suku-4 hanesan hetan inagurasaun ona iha 2022 maibe na realidade hatudu UNP seidauk remata hodi entrega uma ida ne’e ba benefisariu sira, ate adata benefisariu seidauk hela ba, hanesan iha Aldeia Lorokida uma rua finaliza ona no na’in hela ba ona no uma ida seluk na’in labele hela ba tanba mate ona, maibe uma UNP ne’e implementa iha 2021 nian” dehan Veteranu Fernando Fereirra.
Entrentantu Konstrusaun UNP 3 iha Aldeia Lorokokida, Suku Fohorem, postu Administrativu Fohorem, hahu konstrui iha tinan 2021 ne’ebé to’o agora seidauk finaliza maibe oitavu governu inaugura ona iha tinan 2022.
Jornalista : Julio Salinas
Editor : Chamot Nahac
