Maubisse (RCCT)14-08-25-Xefe Suku Maubessi, Wilson Nivio Maria Pereirra Mendonça, hatete odamatan Rabilau nakloke ba ema hotu hodi kontribui dezonvolve fatin turizmu ne’e sai furak liu tan iha futuru.
Lideransa Suku ne’e dehan ho liu husi ema hotu nia kontribuisaun mak fatin turizmu komunitaria Rabilau sei sai dezenvolvidu liu tan iha futuru. Nivio dehan lia ne’e iha ambitu atividade Interkambio jornalista no mos selebrasaun loron mundial juvnetude iha Postu Administrativu Maubisse, foin lalais ne’e.
“Ha’u hanoin ho imi nia prezensa hanesan mos parte ida ne’ebé bele fo apoiu ami hodi bele hadi’a di’ak liu tan sitiu turistiku Rabilau ba iha futuru, ho imi nia prezensa hanesan parte ida ne’ebé bele kontribui hanoin ruma, no parte di’ak ba aban bainrua bele husik hela iha fatin ida ne’e, nune’e ba oin ami rasik iha Maubisse no Rabilau bele fo ba iha governu atu nune’e bele servisu hamutuk hadi’a di’ak liu tan sitiu turistiku ida Rabilau,” Xefe Suku Maubessi, Wilson Nivio Maria Pereirra Mendonça, dehan.
Vizitante husi Alumni Parlamentu Foinsa’e Timor-Leste (APFTL), Diviana Sarmento, hatete ema hotu iha responsavelidade atu kontinua promove turizmu komunitaria Raibilau hodi atrai vizitante nia intrese.
“Fatin ida ne’e potensial para ita atu kontinua promove, la’os deit iha ita nia munisipiu, maibe ita hakarak atu promove ba iha mundu katak ita mos iha fatin ne’ebé furak, tanba ne’e ita hakarak atu organiza atividade ne’e iha fatin ida ne’e, mesmu ita mos selebra loron mundial foinsa’e nian ne’ebé mundu hotu realiza, tanba ne’e ita iha atividade lubuk sei realiza, no agradese tebes ba iha lisan Rabilau nian liliu lia na’in hamutuk ho komunidade ni xefe suku vele simu ona ami iha fatin ida ne’e” nia dehan.
Sikun seluk Jestor Peskiza Influensia Oxfam iha Timor Leste, Adilson da Costa Junior, haktuir Rabilau iha potensialidade turistiku barak hodi bele atrai ema atu vizita ho fo benefisiu ba komunidade agrikultur sira iha fatin ne’e.
“Pontensia barak iha fatin ida ne’e, parese ema barak hatene ona no iha ema barak mos seidauk hatene saida maka Rabilau iha, ita rona deit, maibe bainhira mai ita sente katak Rabilau iha ninia uniku, iha potensia turistiku komunitaria ne’ebé maka parese ba oin sei bele dezenvolve diak liu tan, no ida ne’e sai hanesan oportunidade ida atu bele ajuda komunidade sira, agrikultor sira iha ne’e, ita nia joven sira atu kontinua promove katak Timor mos iha potensia oi-oin la’os de’it iha Tutuala, la’os deit Atauro no Baukau ka iha fatin potensia sira seluk, maibe ita iha potensia ida ne’ebé barak tebes” nia haktuir.
Enkuantu foin dadaun ne’e Oxfam iha timor leste servisu hamotuk ho Asosiasaun Jornalista Timor Lorosa’e, Alumni Parlamentu Foinsa’e Timor-Leste (APFTL), Mata Dalan Institutu (MDI), Timor Leste Organic Fertilizer (TILOFE), Ermera Ai-Kulat Mutin Organiku (EAMO), no Forum Juventude Difisiensia Timor-Leste (FJDTL) organiza no partisipa iha expozisaun Rabilau inklui hodi komemora juventude mundial ne’ebé monu iha loron 12 fulan Agustu 2025. Tan ne’e Xefe Suku Maubessi Wilson Nivio Maria Pereirra Mendonca, agradese no tuir nia dehan liu husi atividade ne’e bele promove sitiu turistiku Rabilau ba iha mundu no bele atrai ema barak liu tan vizita sitiu turistiku Rabilau.
Jornalista : Julio Salinas
Editor : Chamot Nahac
