Prezidente ROCCOV Vitoria Maria do Carmo Barros. hateten apoiu ne’e atu hodi hakman familia sira ne’ebé foin lalais afeita ba inundasaun ne’ebe akontese iha Postu Tilomar no mos sira ne’e moris ho kondisaun vulnuravel nomos difisiensia.
“Ajudus ne’ebé mak ita hetan naton, espera katak ida ne’e bele naton ba ita no ajudus ida ne’e ita hetan husi Rotarian Australia no mos ajuda husi ita nia maun ho bin sira husi Rotarian Dili Lafaek ne’ebé ajudus ne’ebé ita iha mak ne’e ajudus ne’e ita fo ba familia ne’ebé mak hetan inundasaun foin lalais” esplika Vitoria Maria do Carmo Barros.
Administrador Postu Administrativu (APA)Tilomar, Venancio Sarmento, apresia ho apoiu ne’e, nune’e nia esklarese sei nafatin atu kria kooperasaun ne’ebe di’ak liu ho ekipa voluntariu sira hodi fo apoiu ba komunidade tilomar iha tempu tuir mai.
“Agredese ba ekipa ne’ebé mak suporta ona aihan hira ne’e ne’ebé ami fiar katak ajuda ida ne’e la’os hotu ba iha ida ne’e deit maibe ba oin ita sei kontinua kopera malu karik inundasaun mosu ami sei nafatin presiza ita bo’ot sira nia apoia ba ami nia povu ne’ebe mak hela iha area afeitados sira” Dehan APA Tilomar.
Entretantu atividade ne’e realiza tanba iha kopersaun di’ak hodi halo Mobilizasaun sasan husi Dili mai suai hetan apoiu trasporte husi Senor Jacinto Rigoberto, nune’e mos iha distribuisaun apoiu ba benifisiariu sira iha tilomar, hetan tulun transporte husi Autoridade Protesaun Sivil Munisipiu Covalima, Servisu Munisipal Protesaun Civil no Jestaun Dezastre Naturais Covalima, Kareta ida mos husi Membru Tactical Team Covalima Sr. Nikolau nomos Administrador Postu Administrativu Tilomar, no ekipa distribuisaun kompostu husi voluntariu RCCT, Autoridade Munisipiu Covalima hanesan Diretór Logistik, Diretór Ajensia Fiskalizasaun, Administrador Postu Administrador suai, Pontu Fokal Sekretariu Estadu Dezenvolvimentu Lokal destakada iha Suai, no ekipa ROCCOV, reprezentante Rotary Club of Dili Lafaek.
Jornalista : Moichung
Edirot : Chamot Nahac
