COVALIMA—-Durante loron rua nia laran Universidade Oriental Timor-Leste Leste (UNITAL) halo pos Graduasaun Leadership Training oinsa atu hametin nasionalismu ho sentimentu patriotismu ho nia tema promove Sentimentu patriotismu ho pertensimentu ba akademista hodi sai ajenti ba mudansa iha prosima Jerasaun iha Munisipiu Covalima.
Xefe Progarama Manuel Goncalves Mauhura, UNITAL Loke pos graduasaun, leadership training ba estudante sekundaria sira ne’e ho objetivu atu hametin Nasionalismu no sentimentu patriotismu ba estudante sira Iha Munisipiu covalima.
“Tinan ida ne’e ami hili Covalima sai hanesan fali hodi hala’o ami nia atividade ho nia objetivu atu hametin fali ita nia nasionalismu ita nia sentimentu patriotismu no habelar liu tan ba ita nia populasaun em jeral liliu ba ita nia estudante sekundaria sira iha Covalima, tamba ita hatene katak atu transforma no atu prepara jerasaun diak liu ba futuru ita tenki hahu agora, entaun parte akademiku ami hanoin katak rai ida ne’e ita nian hotu, tan ne’e ho kbi’it uotoan ne’ebe ami iha ohin hakata mai iha Covalima para de pois bele partila, bele konta tantu Siensia ou historia ba ita nia estudante sira ne’ebe mak ohin partisipa,” informa Xefe Programa Manuel Goncalves Mauhuru, ba jornalista sira hafoin iha salaun Administrasaun Munisípiu Covalima Sabadu (28/01).
Mauhura afirma programa ida ne’e integradu husi pos graduasaun nian, tanba ne’e sente orgulhu tanba hetan partisipasaun husi estudante sekundaria jeral publiku Suai, no eskola Sekundaria Catolika Ave Maria Suai.
Mauhura espera katak buat diak atu hetan husi formasaun ida ne’e maka bele iha ona konsiensia katak rai ida ne’e ita nian.
“Ba oin ne’e ita jerasaun futuru ita nia hahalok la dun diak ba futuru tenke muda no haburas hahalok ne’ebe diak, tanba atu hasoru fururu ne’e tenke prepara-an” nia dehan.
Reprezenta Administrador Munisipiu Covalima Ergilio Ferreira Vicente, informa, tempu to’o ona edukasaun sivika importante atu haforsa iha ne’ebe deit no aproveita mos ba lideransa fundador sira ne’ebe sei moris iha Munisipiu Covalima.
“Tempu to’o ona edukasaun sivika tenke kontinua haforsa iha ne’ebe deit, halo husi institusaun ne’ebe deit no aproveita mos Ita nia lideransa fundador sira atu moris bele transmiti asuntu sira ne’e, Ita lakohi jerasaun kontinuador, Jerasaun fundador no Jerasaun ida mak ita hatete jerasaun jestroidor, Jerasaun ida maka tenki ser hametin haforsa no kontinua saida mak ita nia fundador sira nia mehi” nia dehan.
Nia husu ba joven sira atu defini an halo didiak hodi dezenvolve rai ida ne’e no lakohi atu ema temi bebeik dehan jerasaun foun destridor.
“Hau nia mensajen ba alin Sira ne’ebe mak la konsege sai testamunia ba prosesu Ukun rasik aan, atu difini imi nia-an persija didiak, prosesu ne’ebe mak ita iha labele sai fali jerasaun ne’ebe Destroidor” haktuir reprezentante Administrador Munisipiu Covalima ne’e.
Entretantu universidade oriental Timor Leste (UNITAL) halo pos graduasaun leadership training ne’e realiza iha Salaun Administrasaun Munisipiu Covalima hetan partisipa husi eskola sekundaria Publiku Suai no eskola sekundaria Catolika Ave Maria Suai, no treinamentu ida ne’e hala’o durante loron rua nia.laran hahu sabadu no remata iha Domingu.(Azu)
