Covalima (RCCT) 19-02-24-Komunidade iha Aldeia Aitos, Suku Dato Rua, Postu Administrativu Fohorema, durante tinan barak hahu husi okupasaun Indonezia mai to’o Timor-Leste hetan ukun rasik an tama ona ba tinan 24, governu troka malu ba mai to’o dala sia ona maibe kuitadu povu Aitos sei kontinua nafatin halerik ba estrada tanba laiha ukun na’in ida hanoin hodi loke estrada ba komunidade.

Komunidade Aitos Jacinto dos Santos informa estrada ladi’ak difikukta tebes komunidade atu lori produtu lokal asesu ba merkado no problema ida seluk maka komunidade hetan moras susar tebes atu lalais lori ba to’o sentru saude iha Fohorem liu liu atu asesu ba ospital suai.

“Katuas ho ferik sira nia halerik iha Aldeia Aitos, dok husi postu no suku tanba ne’e ami husu ba governu atu tau matan hadi’a ami nia estrada, ahi bele lakan ona, bee bele laiha ami povu bele la’o buka tun sa’e ne’e tenke iha maibe estrada ladi’ak difikulta tebes ami, tanba Aitos dok liu husi postu, bainhira atu lori ami nia produtu lokal ba bazar karik terus la halimar satan iha tempu udan hanesan ne’e kareta la tama ami susar no sasan sira ne’e rai to’o dodok deit tan ne’e husu ba governu atu tau matan mos ba povu Aitos” informa Komunidade Aitos Jacinto dos Santos ba jornalista sira iha Aitos Sesta (16/02) foin lalais ne’e.

Xefe Aldeia Inacio Ximenes haktuir, Aldeia Aitos kompostu husi Xefe familia 86, ho nia total populasaun hamutuk 390, durante tinan barak nia laran susar tebes atu asesu ba estrada tanba la hetan atensaun husi governu.

“Estrada difikulta tebes ami komunidade iha fatin ida ne’e tanba ita hareeligadu liu ba iha ekonomia familia wainhira komunidade atu lori sira nia produtu lokal asesu ba merkadu susar, tanba hare ba iha kestaun dalan ne’ebé ladi’ak, iha tempu udan dalan ne’ebé iha ita labele uza ho transporte ruma liliu hanesan motorizada ida ne’e mak difikulta ami iha aldeia ida ne’e, tan ne’e hanesan xefe aldeia hakarak husu ba iha nonu governu ne’ebé toma responsabilidade konaba estrada nian, karik bele fasilita netik ami komunidade ida ne’e atu nune’e ami mos bele asesu ba estrada ho diak hanesan maluk sira husi aldeia seluk ne’ebe asesu ona ba estrada” nia dehan.

Entertantu, Aitos hanesan Aldeia ida ne’ebé hela iha area remotas, ho total populasaun hamutuk 390, mai husi xefe familia hamutuk 86, Aldeia Aitos dok husi Suku Datorua ho distansia kilometro 3 resin no dok husi Postu Administrativu Fohorem ho distansia kilometro 6 resin.

Jornalista : Julio Salinas

Editor : Chamot Nahac