COVALIMA—-Hafoin akontese udan boot iha Kuarta (08/02) loro kraik kuaze oras rua resin, halo korente mota karau ulun tun maka’as halo ponte Mali Queric kotu hodi difikulta movimentu transporte publiku sira.
Ponte Mali Queric lokaliza iha Aldeia Orun, Suku Ogues, Postu Administrativu Maucatar kotu difikulta movimentu transpote dirasaun Suai ba Maucatar, Fatululik no ligadu ba iha Munisipiu Bobonaro labele utrasa pasa.
Ponte Mali Queric durante hanesan ponte alternativa hodi hatutan movimentu transporte husi kapital munisipiu Covalima, Postu Administrativu Suai ba Postu Administrativu Maucatar no Fatulilik, liu ba Munisípiu Bobonaro.
Komunidede Aldeia Orun Calistro do Carmo husu ba autoridade kompotente atu toma atensaun lalais ba ponte ne’ebe kotu nune’e bele fasilita ema no transporte mak atu halo viazen husi Suai ba Maucatar no Fatululik.
“Ami sente triste, tanba ne’e husu governu atu bele hadia lalais, ponte ne’e, agora ponte ne’e kotu, ema labele ba mai Suai Maucatar no mos Fatululik liu ba Bobonaro” informa Komunidade Calistro do Carmo ba jornalista sira iha Aldeia Orun.
Hafoin akontese udan boot iha semana ne’e no kuarta feira akontese korente mota bodi estraga ponte Mali Queric kotu no bee tama komunidade nia uma kain-1 lori hotu sasan dapur nian iha aldeia orun suku ogues, no korente mota konsege hakotu mos ponte Mali Queric.
Hafoin halo observasaun ba akontesementu mota sa’e iha maligirik, Diretór Servisu Munisipál Jestaun Dezastre Naturais Quintinho da Costa dehan ponte Mali Queric kotuk difikulta mos transporte publiku no ambulansia tula ema moras husi Maukatar no Fatululik mai suai, tanba ne’e persija halo intervensaun imediatamente.
“Ho akontesementu udan boot, halo ita nia infrastrutura baziku hanesan estrada no ponte kotu, ho ida ne’e transporte sira labele liu ba mai, Suai, Maukatar liu ba Fatululik, kareta ambulansia mos labele tula ema mate ba Fatululik no Maukatar, tanba ne’e governu tenke halo intervensuan imediatamente” deklara Diretor Servisu Munisipal Jestaun Dezastre Naturais, Quintino da Costa.
Relasiona ho akontesementu udan boot rezulta ponte Mali Queric kotu Administrador Munisipiu Covalima, Francisco de Andrade tun direta iha terenu hodi halo observasaun no komunika kedas ba Ministru Obras Publika atu haree urjentemente ba asunte ne’e.
“Ohin molok ha’u mai iha ne’e ha’u simu telefone husi komandante Apoiu Protesaun Civil Munisipiu Covalima, no nia haruka foto mai ha’u, entaun foto sira ne’e hau haruka ona ba ita nia ministru obras publika maibe seidauk iha responde, hau mos kontaktu ona ba Obras Publiku iha Covalima atu mobiliza ekipametu hodi halo intervensaun ba ponte kotu ne’e, ne’ebe aban udan para mak ita sei haree ida ne’e” Esplika Administrador Covalima, Francisco de Andrade ba jornalista Business Timor iha ponte Mali Queric, Aldeia Orun,, Suku Ogues, Kuarta (08/02)
Entrantu Ponte Maligirik lokaliza iha Aldeia Orun, Suku Ogues Postu Administrativu Maukatar Munisipiu Covalima.(Azu)
