Covalima (RCCT) 13-06-25-Durante ne’e wainhira akontese udan bo’ot iha Covalima bee sempre suli tama no nalihun iha resintu edifisiu Sentru Saude Suai no edifisiu Servisu Munisipal Saude Covalima.
Diretór Servisu Munisipal Saude Covalima, Domingos Sequeira hatete bee tama mai iha edifisiu saude Covalima no Sentru Suai tanba impaktu be intupidu iha baleta basa foer taka metin bee dalan.
“Problema bo’ot liu maka agora hare ba ita nia saluran pembuangan sira ne’e maka kada ves intupidu, liliu ita nia warung oan sira ne’e soe sasan arbiru hanesan agua sira hemu hotu naran soe arbiru, wainhira udan ben sulin tun mai lori intupidu ba ita nia saluran sira ne’e, bee dalan laiha ona atu liu ne’e signifika katak bee tenke tama ona, maibe ohin ha’u koordena ona Diretór Servisu Munisipal Obras Publiku. Tekniku mai hare para loke halo luan uitoan, para bee bele la’o ho di’ak, sentru saude nian mos hanesan udan ona bee sempre tama tanba bee dalan laiha atu liu foer maka taka metin ikus mai halo bee tama ba iha sentru saude laran” Diretór Servisu Munisipal Saude Covalima, Domingos Sequeira, dehan.
Nia salienta wainhira akontese udan bo’ot, bee nalihun, prejudika funsionariu sira iha servisu no mos halo pasiente sira ne’ebé mai konsulta iha Sentru Saude Suai la dun kofortabel, maibe la fo impaktuk ba ekipamentu sira ne’ebé iha.
“Udan been nakonu ona ita nia staf sira ba mai halo servisu ladi’ak no mos ita nia pasiente sira mai halo tratamentu saude la’o ba mai mos la di’ak, bee tama la fo impaktu ba ekipamentu sira tanba bee naton de’t” nia dehan.
Maske akontese udan bo’ot bee sempre suli tama iha edifisiu servisu saude Covalima no Sentru Saude Suai, maibe la fo impaktu hodi estraga ekipamentu.
Jornalista : Julio Salinas
Editor : Chamot Nahac
