COVALIMA (RCCT), 1 Setembru 2026-Autoridade Postu Administrativu Zumalai halo abertura ba jogu desportivu komunitáriu iha Suku Lour, Postu Administrativu Zumalai, Munisípiu Covalima, hodi komemora trajédia violasaun direitus umanus iha 7 Setembru 1999.
Reprezentante Administradór Postu Administrativu Zumalai, Armando da Silva, iha abertura atividade ne’e, alerta ba jogadór sira atu joga ho disiplina, respeitu no espírito unidade durante kompetisaun.
Nia hateten katak atividade desportiva nivel suku la’ós de’it atu disputa manan ka lakon, maibé importante mós atu hametin unidade entre komunidade no hasa’e relasaun amizade entre jogadór sira.
“Kompetisaun ne’e atu enkoraja ita hotu atu hametin unidade no labele lori diferensa partidária, etnia ka sukuismu. Ita presiza unidade atu atividade desportiva bele kontinua realiza iha tinan sira oin mai,”.
Armando da Silva hato’o deklarasaun ne’e bainhira halo abertura atividade desportiva komunitáriu ne’ebé organiza iha ámbitu komemorasaun trajédia violasaun direitus umanus 7 Setembru 1999 iha Suku Lour.
Nia mós husu ba jogadór sira atu rona orientasaun husi koordenadór desportivu no komisaun organizadór, hodi evita konflitu durante kompetisaun.
“Bainhira realiza atividade desportiva, ita presiza rona mós koordenadór desportivu sira, atu labele hamosu konflitu. Ita tenke halo desportu ho amizade no labele de’it hanoin kona-ba manan ka lakon,”.
Iha sorin seluk, Prezidente Komisaun Organizadór, Denis Barreto dos Santos, hateten katak komisaun rejista ona klubu feto 11 no klubu mane 7 atu partisipa iha kompetisaun desportiva nivel suku ne’e.
Nia esplika katak atividade ne’e realiza ho objetivu atu komemora trajédia violasaun direitus umanus 7 Setembru 1999. Komisaun organizadór prepara kompetisaun ne’e atu hala’o durante semana ida, iha dader no lokraik.
“Realiza atividade desportiva nivel suku ho objetivu atu komemora trajédia violasaun direitus umanus 7 Setembru 1999. Tanba ne’e, komisaun organizadór halo preparasaun atu atividade desportiva ne’e hala’o durante semana ida, iha dader no lokraik,”.
Denis Barreto dos Santos mós husu ba jogadór sira atu respeita regra kompetisaun no hatudu disiplina iha kampu laran. Nia subliña katak objetivu prinsipál la’ós de’it atu hetan prémio, maibé mós atu promove amizade, unidade no harmonia entre komunidade.
“Jogadór sira tenke tuir regra, labele hanoin de’it atu manan ka hetan prémio, maibé tenke hatudu disiplina iha kampu laran, hodi kompetisaun bele la’o ho di’ak no ho amizade,”.
Komemorasaun trajédia violasaun direitus umanus 7 Setembru 1999 iha Zumalai hetan apoiu osan husi Museu Memoriál Covalima ho montante US$. 2.000, no mós kontribuisaun husi veteranu sira no komunidade.
Osan ne’e la’ós uza de’it ba atividade desportiva, maibé mós atu suporta atividade komemorasaun seluk ne’ebé sei realiza hahu hosi loron 5 to’o loron 7 Setembru 2026.
Jornalista: Julião Correia
Editor: Paul Mandeu
