Covalima (RCCT) 30-10-23-Rezultadu eleisaun orgaun Suku ba peridu 2023-2030 iha Munisipiu Covalima Suku 6 maka la hakat ba iha segundu volta tanba iha Kandidatu Xefe Suku manan Maioria obsuluta iha primeiru ronde, maibe ba suku 24 seluk iha Covalima obrigadu tenki hakat ba segundu volta tanba manan laliu bareira 50+1.
Diretór Sekretariadu Tekniku Administrasaun Eleitoral Munisipiu Covalima Francisco Gusmão, hatete Suku 6 iha Covalima mak la realiza tan eleisaun Segundu ronde maka hanesan iha Postu Administrativu Fohorem, iha Suku Dato Rua no Suku Laktos, Postu Administrativu Suai iha Suku Debos no iha Suku Mape, Ucekai ho Zulo, Postu Administrativu Zumalai.
“Foin lalais hala’o ita nia eleisaun orgaun suku iha Covalima ne’ebé haree husi nia rezultadu iha suku 6 maka sai direitu ba eleisaun suku ba primeiru volta nian hanesan Postu Administrativu Fohorem iha Suku Laktos ho Dato Rua, Postu Administrativu Suai Suku Debos no Postu Administrativu Zumalai maka Suku Mape, Zulo no Ucekai la hakat ba iha segundu volta, tanba sira manan maioria iha eleisaun ida ne’e” informa Diretór Sekretariadu Tekniku Administrasaun Eleitoral Munisipiu Covalima Francisco Gusmão, ba jornalista RCCT iha nia knar fatin Segunda ne’e.
Nia haktuir husi rezultadu eleisaun ne’e Covalima iha 24 mak sei hakat ba segundu volta ho total kandidatura hamotuk na’in 49, husi ne’e iha kandidatura feto na’in 3 no mane na’in 46.
“Iha suku 24 sei avansa ba segundu volta ho nia total kandidatura hamutuk ema na’in 49, husi kandidatura 49 ne’e kompostu husi feto na’in 3 no mane na’in 46, tanba saida maka iha 49 tanba iha postu Administrativu Fatumea, Suku Belulik Leten kandidatu na’in lu maka avansa hotu ba segundu volta tanba ho votus hanesan tan ne’e maka iha kandidaura iha Covalima hakat ba segundu volta ho kandidatura hamutuk 49 ne’e” nia esplika.
Entertantu Munisipiu Covalima kompostu husi Postu Administrativu 7, Suku 30 no Aldeia hamutuk 148, ba eleisaun orgaun suku ba periodu 2023-2030 iha Covalima kandidatura Xefe Suku hamutuk 165 Kompostu husi Feto Na’in 16 no mane na’in 149. hafoin realiza eleisaun ba orgaun suku kandidata ne’ebe avansa ba segundu ronde hamotuk ema na’in 49 kompostu husi kandidatura feto na’in 3 no mane na’in 46, husi suku 24 tanba suku 6 hetan ona rezultadu katak iha kandidatu mak manan maioria obsuluta eleito sai xefe suku.
Jornalista : Julio Salinas
Editor : Chamot nahac
