Covalima (RCCT) 28-92-25-Sidadaun sira iha timor leste bele sosa motorizada no kareta iha Malaka no Atambua NTT Indonesia no hatama mai timor liu husi dalan legal maibe tenki selu taxa ba estadu ho pursentu lima (5%) husi sasan nia folin.
Tanba ne’e Diretór Autoridade Aduaneiro iha Munisipiu Covalima Nuno Nogueira husu ba komunidade sira liu liu iha area fronteira atu la bele halo nogosiu liu liu sosa kareta no motorizada liu husi dalan illegal.
“Hakarak aviza nafatin ba komunidade sira katak bainhira atu hala’o atividade exportasaun no importasaun inklui kareta ho motor ne’e liu husi dalan ne’ebé legal, signifika ita nia governu redus taxa pursentu lima liliu ba iha motor ho kareta sira ne’ebé tama mai, kareta sira ne’e depende ba ninia kustu ne’ebé bo’ot depois iha kustu seluk ne’ebé bele aumenta, maibe ba ita nia motorizada ne’e mos depende ba nia presu tama mai kona pursentu lima ne’e hare ba resivu ka invoice depois bele hetan rezultadu ba ida ne’e” nia dehan.
Notisia Relevante : https://www.rcct.tl/alfandega-la-bandu-sidadaun-sosa-motor-iha-atambua-maibe-tenke-hatama-husi-dalan-legal/
Nuno husu ba komunidade sira hotu kuandu hakarak atu sosa kareta ka motor husi sorin hodi hatama mai Covalima liu husi dalan legal maka tenke halo komunika uluk ho Alfandega.
“Ami hakarak apela nafatin ba komunidade sira atu bele mai komunika ho ami atu nune’e ami bele fasilita liu husi dokumentu importasaun lalais, hodi hatama netik osan ba ita nia estadu” nia informa.
Diretór Autoridade Aduaneiro Munisipiu Covalima, Nuno Nogueira, dehan governu liu husi Alfandega afirma ona pozisaun redus taxa pursentu lima no prontu atu fasilita dokumentus ba komunidade sira ne’ebé hakarak atu sosa motor no kareta husi Indonezia tama mai timor leste liu husi pontu entrada Salele Tilomar, Covalima, hodi selu taxa pursentu lima ba estadu.
Jornalista : Julio Salinas
Editor : Chamot Nahac
