Covalima (RCCT) 21-03-25- Provizoriamente Servisu Konservatoriuo Rejistu no Notariadu (SKRN) Munisipiu Covalima halo atendimentu ba sidadaun sira trata pasaporte depende ba orariu ne’ebé submete mai husi diresaun nasaional.
Tanba ne’e provizoriamente Servisu Konservatoriu Rejistu Notariadu (SKRN) Munisipiu Covalima bele atende deit sidadaun na’in 20 kada loron bazeia ba orientasaun husi diresaun nasional.
“Atende konaba pasaporte, sistema la hanesan uluk ona, sistema ida agora orariu ba pasaporte ne’e submete husi nasional maka mai, tuir ha’u nia hatene semana ida dala rua, maibe ba ba oin ne’e maka ita sei hare tanba data fixsu ne’e seidauk fo mai, ida fulan Marsu nian ne’e atende komesa iha loron 6-14-19-24 ho 27 ne’e ba fulan marsu nian maibe ba fulan Abril nian hein orariu husi nasional” nia dehan.
Diretóra Servisu Munisipal Konservatorio Rejistu Notariadu (SKRN) Munisipiu Covalima Filomena Gusmão, informa katak iha munisipiu covalima, maioria sidadaun sira trata passaporte komum.
“Sim orariu fo sai ba ami katak iha loron ida ami bele atende deit ema na’in-20, komunidade sira ne’ebé mai trata pasaporte ne’e maioria trata pasaporte komum, maibe sira halo hotu pasaporte atu lori ba iha ne’ebé ami la hatene, konaba presu ba pasaporte balu mai selu $ 50,00, balu selu $ 75,00 no balu mai selu $ 100.00” dehan Diretóra Servisu Munisipal Konservatorio Rejistu Notariadu (SKRN) Munisipiu Covalima Filomena Gusmão.
Enkuantu durante fulan marsu nia laran, Servisu Konservatoriu Rejistu no Notariadu (SKRN) Munisipiu Covalima halo atendementu ba sidadaun sira trata pasaporte bazeia ba orariu ne’ebé simu husi nasional, loron ida atende deit sidadaun na’in 20.
Jornalista : Julio Salinas
Editor : Chamot Nahac
