Covalima (RCCT) 10-05-21 Relasiona ho kazu numeru Covid1-19 nebe sa’e maka’as iha território Timor-Leste, Saúde Municipio Covalima hahu ona foti dadus ba ema ho idade 60 ba leten, Inklui ba ema nebe moras tensaun, ran midar nsst, nune’e bele hetan Vasinasaun Covid-19 AstraZeneka.
Ba Jornalísta RCCT, Diretur Servisu Saúde Municpio Covalima Filipe Perreira Lemos haktuir, hafoin remata foti dadus ne’e, Servisu Saúde Muincipio sei haruka dadus ne’e ba Nasionál, nune’e bele hetan Vasinasaun baseia ba dadus nebe maka professional Saúde sira foti iha Suco no Aldeia sira.
“Agora dadaun professional Saúde sira tama Suco no Aldeia hodi foti dadus ba ita nia ema sira ne’ebe ho idade maior (60 ba leten), nomos ba sira nebe maka ho moras tensaun, ran midar nsst, depois númeru ne’e ita sei hato’o ba iha Nasional hodi ita bele hetan Vasina, baseia ba numero hirak nebe maka ita nia pessoal Saúde sira foti hela ” Dehan Diretor Filipe Perreira Lemos.
Diretor ne’e seidauk bele fo sai rejultado numeru nebe regista iha Suco no Aldeia, tanba Pessoal Saude sira seidauk entrega dadus ne’e ba Servisu Saúde Municipio.
Tamba ne’e Diretor ne’e haktuir, loron atu simu Vasinasaun seidauk bele determina, tanba pessoal Saude sira, sei halo hela prosessu registrasaun, ho nune’e bainhira remata halo registrasaun, Servisu Saude sei haruka ba nivel nasional hodi desloka Vasina mai iha Municipio, hafoin sona ou halo Vasina baseia dadus nebe maka iha.
“ Vasinasaun ne’e depende ba ita nia inomerasaun husi professional Saúde sira, depois dadus sira ne’e mai hotu Munisipio ita haruka ba Nasional, depois sira bele desloka vasina ne’e Munisipio maka it abele hahu son aba ita nia komunidade sira ne’ebe maka antes ne’e regista ona ” tenik Filipe
Entertanto vasina ne’e fo uluk ba grupo ho idade nebe maka risku ba Covid 19, hanesan ema ho idade 60 ba leten, atu nune’e bele protégé sira husi Covid-19.
“ Sira Grupo idade nebe ita foti numeru agora, sira tenke lalais hetan vasina atu nune’e bele protégé sira husi Covid-19, tanba ita hotu hatene katak, Covid kuandu kona ema, ema ho idade maior ne’e maka mate barak liu, tanba ne’e maka Estado hanoin ba sira nebe idade maior tenke sona uluk, depois periode tuir mai sira nebe maka idade 18-59 sei simu hotu Vasina ne’e ” Diretur Servisu Saude Municipio Covalima ne’e hakotu.
Jornalísta : Tynho Gusmão & Lito de Jesus
Edítor : Chamot Nahac
