Covalima (RCCT)19-08-25-Ministra Edukasaun (ME), Dulce de Jesus Soares, hamotuk ho Veteranu, F-FFDTL no Povu Covalima selebra Tinan 50 ejistensia FALINTIL, hodi hala’o prosesu funu ba libertasaun timor leste durante tempu naruk nia laran ho aten brani komandante no membru FALINTIL sira sakrifika sira nia an mate iha funu laran.
Iha diskursu, Ministra Edukasaun, Dulce de Jesus Soares, husu ba povu tomak iha timor atu hakruk no fo respeitu no onra bo’ot ba lideransa FALINTIL no Membru sira ne’ebé dedika no sakrifika ona an hodi hetan libertasaun nasaional.
“Iha faze defeza soberania estadu nian, ita hare katak ho espiritu no esperiensia ne’ebé FALINTIL nian iha pasadu, husi forsa guerilla tama ba forsa modernu, hahu hatudu daudaun ona oinsa mak FALINTIL bele no kontinua hatuur an, nudar forsa ida di’ak iha kualidade no proporsionalidade ba iha nasaun Timor-Leste”, Ministra Edukasaun, dehan iha kampu ladi suai, wainhira hato’o deskursu ba selebrasaun loron FALINTIL ba dala50.
Governante ne’e fundamenta katak, Estadu sei kontinua investe nafatin iha área defeza, liu husi prepara ekipamentu, kapasitasaun ba rekursu umanu, kontinuasaun estudu ba ofisial sira, formasaun, treinamentu konjuntu ho nasaun seluk ho objetivu atu kria no hasa’e kualidade no profisionalidade FALINTIL-FDTL nian.
Reportanzen RCCT
