Dili (RCCT) 28-05-25-Sekretáriu Estadu Arte no Kultura, Jorge Soares Cristovão, iha, loron 27 fulan-maiu tinan 2025, partisipa iha gravasaun epizódiu ba dala 11 hosi programa “Página do Governo”, ne’ebé iha tempu badak sei fó-sai hosi Rádiu no Televizaun Timor-Leste (RTTL) no divulga iha mídia sosiál.
Durante entrevista, Sekretáriu Estadu aprezenta prioridade prinsipál sira hosi nia mandatu iha setór arte no kultura, iha ne’ebé nia destaka progresu sira ne’ebé alkansa ona no dezafius ne’ebé hasoru iha implementasaun polítikas kulturais ne’ebé define hosi Governu Konstitusionál da-9. Nia aborda mós estratéjia ne’ebé trasa ona hodi hametin setór ne’e, ho objetivu atu garante asesu no partisipasaun hosi sidadaun hotu-hotu, liuliu joven sira, iha vida kulturál nasaun nian.
Diskute mós inisiativa sira ne’ebé la’o hela hodi apoia artista timoroan sira, promove produsaun artístika lokál no hametin infraestrutura kulturál sira.
Nu’udar Koordenadór-Jerál ba Komisaun Organizadora Jogus Desportivus hosi Komunidade País Lian Portugés (CPLP, sigla iha lian portugés) ba da-12, Sekretáriu Estadu aprezenta mós preparasaun sira ne’ebé la’o hela ba eventu multi-desportivu importante ida-ne’e, ne’ebé sei halibur atleta sira husi Estadus-membrus CPLP hotu-hotu iha Dili, husi loron 17 to’o 27 fulan-jullu tinan 2025.
Entrevista ne’e inklui mós aprezentasaun ida kona-ba Sekretáriu Estadu nia vizaun estratéjika ba setór kulturál ida ne’ebé forte, sustentável no asesivel liu, ho ko’alia-liu kona-ba planu sira iha futuru ne’ebé ho objetivu atu prezerva memória koletiva, haburas kriatividade no garante valorizasaun no transmisaun patrimóniu kulturál ba jerasaun foun sira.
“Página do Governo” ne’e promove husi Ministru Prezidénsia Konsellu Ministrus no Portavós Governu, Agio Pereira, iha parseria ho RTTL. Programa ne’e konta ho Nélia Chaves nu’udar entrevistadora, Ika Moniz nu’udar produtora ezekutiva, no apoiu tékniku husi ekipa mídia sira Gabinete Primeiru-Ministru nian, Gabinete Portavós Governu, no hosi Gabinete membru Governu nian ne’ebé hetan entrevista. Inisiativa ida-ne’e ho objetivu atu hametin transparénsia no prosimidade entre Ezekutivu no sidadaun sira, hodi permite ba populasaun atu akompaña, ho dalan asesivel no informadu, asaun prinsipál no polítika públika sira ne’ebé la’o hela.
Atu asiste epizódiu sira Página do Governo nian ne’ebé maka fó-sai ona, hanehan iha link sira tuirmai ne’e:
• Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária;
• Ministru Negósius Estranjeirus no Kooperasaun;
• Ministru Administrasaun Estatál;
• Ministru Obras Públikas; no
• Ministru Planeamentu no Investimentu Estratéjiku.
