Covalima (RCCT) 11-07-25- Sekretáriu Estadu Kooperativa (SEKoop) Arsenio Pereira da Silva, fo pose ba estrutura Federasaun Multi-Cooperativa RIN HITU Covalima (FMC-RHC).
Politika governu estabelese Federasaun ne’e hodi akumula movimentu kooperativa ekonomia sira ne’eb eziste ona iha Munisipiu Covalima. Sekretáriu Estadu Kooperativa Arsenio Pereira da Silva, dehan.
“Ida ne’e politika no programa governu nian, ne’ebé ita estabelese federasaun multi koperativa kada munisipiu fo hanoin no objetivu ida katak, kada munisipiu sira bele organiza malu liliu iha setor koperativa tenke iha mahon ida ou skcundaria ida ne’ebé ita bolu federasaun para atu akomoda movimentu koperativa privadu sira ne’ebé ejiste iha Munisipiu Covalima,” Sekretáriu Estadu Kooperativa Arsenio Pereira da Silva, koalia iha nia deskursu iha serimonia pose ne’e.
Prezidente Federasaun Multi-Cooperativa RIN HITU COVALIMA (FMC-RHC) Benjamin da Costa, kongratula ba governu da sia ne’ebe estabelese federasaun iha Covalima ho membru hamutuk 624, no fundus hamutuk $ 208, 942.20.
“Kongratula ba governu da sia espesialmente ba SEKoop bele iha planu hodi estavelese federasaun multi koperativa iha Munisipiu Covalima, no Federasaun Multi-Cooperativa RIN HITU Covalima (FMC-RHC) tanba saida maka bolu rin hitu Covalima, Hitu reprezenta postu, rin hanesan forsa ida atu tane Covalima lori ba oin, agora daudaun federasaun Rin Hitu Covalima total membru hamutuk 624, kompostu husi feto-335 no mane-289, no fundus ne’ebé federasaun iha hamutuk dolar Amerikanu rihun atus rua ualu, atus sia hat nulu resin rua sentavus rua nulu ($ 208, 942.20)” Prezidente Federasaun Multi-Cooperativa Rin Hitu Covalima (FMC-RHC) Benjamin da Costa, dehan.
Enkuantu Federasaun Multi-Cooperativa RIN HITU COVALIMA, ne’e sei sai mahon ba Kooperativa Primária sira no kumpri ba valores no Prinsipios Kooperativa Universal, tuir artigu 43 Konstituisaun Republika Demokratica Timor-Leste, konsidera artigu 5, 80 no 84 dekretu lei No. 16/2004, alterada ho dekretu lei No. 76/2022, mak Kooperativa pioneiru sira sente nesessidade atu harii Federasaun apropriada nudar resposta no kontribuisaun ba programa Sekretaria Estadu Kooperativa.
Kooperativa primaria hirak ne’ebé deklara hari’i Federasaun Multi-Cooperativa RIN HITU COVALIMA (FMC-RHC) mak hanesan Cooperativa Primaria CU. SUMA-LOI, Kooperativa Primária CU. HAVIMOR, Cooperativa Primaria, CU. HITBLE, Kooperativa Primaria CU. HABUNA, Kooperativa Primaria CU. BUNAR, Kooperativa Primaria HHM, no Kooperativa Primaria EX.MITILTAR.
Jornalista : Julio Salinas
Editor : Chamot Nahac
