Covalima (RCCT) 12-03-25-Reuniaun Konsellu Ministru (KM) foin lalais ne’e, aprova ona programa merenda eskolar ba Munisipiu Covalima, tanba ne’e, Xefe Governu Kay Rala Xanana Gusmão tatolia lia menon liu husi Sekretariu Estadu Dezenvolvimentu Lokal (SEDL), Mateus dos Santos Tallo atu fo hanoin ba Lideransa Servisu Munisipal Edukasaun Munisipiu Covalima, identifika eskola ne’ebé seidauk iha kuziña no refeitório ba estudante hodi hatama iha planu anual 2026.
Sekretariu Estadu Dezenvolvimentu Lokal (SEDL), Mateus dos Santos Tallo, fo sai mensajem husi Primeiru Ministru (PM) nian ne’e wainhira halo abertura ba atividade Konsulta Sidadania ba autoridade sira iha Munisipiu Covalima Tersa (11/03), iha salaun administrasaun Covalima.
“Primeiru Ministru sita foin lalais iha Konsellu Ministru, ami aprova ona merenda eskolar suku30 iha Covalima, Diretóra Servisu Munisipal Edukasaun, identifika, tau iha planu 2026, liliu kuiziña (dapur) no ida fali konaba labarik sira nia han fatin ho lian Portugues dehan Refotório, ida ne’e mensajen ida ke Primeiru Ministru maka orienta, iha fulan marsu nia laran ne’e nia seidauk tun mai Covalima, ita hahu konsulta sidadania ne’e hatama hotu ona mak foin vizita. Ida tan Prezidente Autoridade ho sekretariu na’in 3 no diretór servisu munisipais na’in 19 ho xefe departamentu sira iha ordem ida katak durante semana rua nia laran ne’e elabora planu ne’e laiha ema ida husu lisensa, se deit maka atu lisensa karta tenke sae ba ministru tanba ita atu aselera prosesu ne’e” Sekretariu Estadu Dezenvolvimentu Lokal (SEDL), Mateus dos Santos Tallo hato’o mensajem PM Xanana nian ba autoridade sira iha Covalima.
Mateus Tallo afirma iha orientasaun PM Xanana ba diretór servisu munisipais na’in19 atu aprezenta planu no programa orsamentu ba komisaun revizaun orsamentu hodi bele hatene.
“Iha orientasaun ida mos ita mai iha jornada orsamentu ba komisaun revizaun orsamentu, prezidente autoridade sei aprezenta deit nia orsamentu, maibe diretór servisu munisipais na’in-19 sei aprezenta imi nia planu programa no orsamentu ida-idak, para membru komisaun revizaun orsamentu hatene saida maka imi atu halo iha munisipiu, entaun servisu delegasaun ne’ebé delega ona mai munisipiu hare didi’ak liña jerais maka ha’u informa ona ne’e” informa Sekretariu Estadu Dezenvolvimentu Lokal (SEDL), Mateus dos Santos Tallo.
Enkuantu mensajem PM Xanana nian ne’e hato’o husi Sekretariu Estadu Dezenvolvimentu Lokal (SEDL), Mateus dos Santos Tallo, ba autoridade sira wainhira partisipa hodi halo abertura konsulta sidadania iha Covalima, iha mensajem ne’e mos PM Kay Rala Xanana Gusmão husu diretór servisu munisipais sira labele husu lisensa durante semana rua nia laran atu nune’e bele aselera lalais servisu hodi finaliza planu anual 2026 nia ba hadi’a povu nia moris iha Munisipiu Covalima.
Jornalista : Julio Salinas
Editor : Chamot Nahac
