Covalima (RCCT) 27-08-25-Prezidente Konsellu Kombatentes Libertasaun Nasional (CCLN-Sigla Portugues), husu ba Veteranu sira atu kumpri Lei no labele halo falsifikasaun ba dokumentu nune’e bele ses dook husi odamante kadeia nian.
Vidal de Jesus ” Riak Leman ” dehan Parlamentu Nasional no Governu mak halo no aprova lei hodi regula veteranu sira tan ne’e husu ba ema hotu atu labele bobar lia no falsifika dokumentu tan hakarak sai veteranu hodi hetan pensaun kada fulan.
“Ko’alia konaba Lei ne’e Kompetensia Governu nian, Partidu mak ba tur iha Governu, Partidu mak ba Tur iha Parlamentu, sira aprova Lei. Imi la kumpri imi ba kadeia, ami la kumpri ba kadeia. Lei tuir hela ita, ita haluha lei maka ita ba kadeia” Prezidente Konsellu Kombatentes Libertasaun Nasional (CCLN-Sigla Portugues) Vidal de Jesus ” Riak Leman ” dehan lia ne’e iha deskursu wainhira partisipa iha kofrensia Munisipal Veteranu Munisipiu Covalima. (25/08)
Riak Leman fundamenta uluk veteranu halo funu no balu mate molok alkasan Libertasaun Nasional, tan ne’e tenki atensaun, ho nune’e labele akontese ho influensia osan halo veteranu balu tama komarka iha era ukun rasik an ne’e.
“Ha’u lakohi ita halo funu, ita terus, ita mate, I depois tanba deit osan ita ba kadeia. Atensaun didi’ak, ha’u lakohi ita bo’ot sira falsifika sasan (dokumentus) ba simu osan, depois ba fali kadeia. Ne’e labele !” Tenik Reak Leman.
Veteranu Riak Leman fo atensaun katak akontese ona iha Munisipiu Balu, Veteranu balu selu ona multa no balu tama ona kadeia tanba la kumpri lei no kuridor Kombatente Libertasaun Nasional nian.
Jornalista :Gabriel Amaral da siva
Editor :Chamot Nahac
