Covalima (RCCT) 09-06-25-Prezidente Tribunal Rekursu (PTR) Afonso Carmona, optimista hakarak hadi’ak liu tan dezenvolvimentu iha setor justisa liu liu sira iha tribunal.
Afonso Carmona manifesta hanoin ne’e iha Covalima, wainhira halo vizita dahuluk ba Tribunal Judisial Primeira Instansia Suai, hafoin simu pose nudar Prezidente Tribunal Rekursu (PTR) Timor Leste. Nia dehan iha vizita ne’e atu hatene kondisaun real ne’ebé tribunal infrenta.
“Ha’u hanoin atu dezenvolvimentu setor justisa espesial nomeadamente tribunal, entaun iha sutuasaun ida ne’e hau hili mai vizita iha fatin-fatin tribunal sira hanesan Tribunal Judisial Primeira Instansia Suai, Oekusi no Baukau. Ha’u hili primeiru Suai, iha vizita ida ne’e mai ho membru konsellu sira, ami iha pakote tolu, primeiru oinsa reuniaun ho juis sira, ofisial sira, ho funsionariu sira iha tribunal liliu atu hare direita saida maka sira lamentasaun, hare saida maka ita atu suporta para tribunal ne’e funsiona ho di’ak, agora di’ak hela maibe ita presija hakbesik an mai ita nia ofisial sira, mai ita nia juis sira para sira mos servisu ho vontade di’ak. Pakote ida fali sei halo reuniaun espesifiku ida ba sira Juis no Ofisial, ita hakarak lori nia ativu iha dezenvolvimentu servisu ne’e ho dignu no kontente. Pakote ida ikus ne’e konsellu reuniaun, loloos ne’e reuniaun iha Dili, maibe konsellu hakarak mai reuniaun iha foho, servisu iha Dili ita lori mai iha ne’e” Prezidente Tribunal Rekursu (PTR) Afonso Carmona, informa ba jornalista sira iha Tribunal Judisial Primeira Instansia Suai, Segunda (09/06).
Juiz Administrador Tribunal Judisial Primeira Instansia Suai, Nasson M. A. M. Doutel Sarmento, orgullu ho vizita Prezidente Tribunal Rekursu ne’e, para bele hatene di’ak liu tan kondisaun situasaun sira tomak iha Tribunal Judisial Primeira Instansia Suai.
“Orgullu no onra bo’ot ida mai iha Tribunal Judisial Primeira Instansia Suai, depois de Prezidente Tribunal Rekursu simu pose no mos ho membru konsellu sira foun foin hetan nomeasaun husi Prezidente Republika, Parlamentu Nasional no governu, no sira deside hodi halo primeiru vizita mai kedas iha Tribunal Judisial Primeira Instansia Suai, ida ne’e orgullu no onra bo’ot ida mai ami, agora preokupasaun ne’ebé ami sei hato’o konaba forsa tribunal ida ne’e iha no frakeza, kazu sira ne’ebé maka iha no ameasa sira ne’ebé iha, hato’o problema ida mos tribunal ida ne’e hasoru mos konaba rekursu limitadu liliu iha apoiu administrasaun finansas no lojistika, formasaun ba juis ofisiais no mos funsionariu sira nune’e mos ba promosaun kareira ba juis sira nian, ba iha ofisial justisa sira nian no mos ba iha funsionariu sira” nia dehan.
Enkuantu Prezidente Tribunal Rekursu (PTR) Afonso Carmona, hamotuk ho membru konsellu sira hala’o vizita mai iha Tribunal Judisial Primeira Instansia Suai, ho objetivu hakarak hakbesik liu no motiva funsionariu sira hodi bele halo servisu ho di’ak liu iha futuru.
Jornalista : Julio Salinas
Editor : Chamot Nahac
