Covalima (RCCT) 19-10-23–Tobias de Araujo Amaral nudar sidadaun foinsa’e ida iha Suku Matai, Postu Administrativu Maukatar, Munisipiu Covalima ne’ebé iha mehi hakarak atu hadi’a suku, tan ne’e foti desizaun hakarak kandidata ba xefe suku, maibe iha loron 13 fulan ne’e kandidatu hotu hakat ba iha sede suku hodi submete dokumentu no lista kandidatura nian ba iha meja apoiu suku eleitoral maibe sorte at ba nia “Tobias” la konsege rejista naran tanba iha faillansu dokumentu.

Tobias de Araujo Amaral hateten iha loron 13 foin lalais, wainhira lori dokumentus no lista apoiante atu rejista Iha meja apoiu suku eleitoral mak estabelese iha Sede Suku Matai maibe dokumentu ne’ebé nia lori iha lista, apoiantes balu asina no balu hanehan metan deit tan ida ne’e maka prejudika Tobias la pasa iha selesaun dokumntus atu hodi kandidata ba Suku.

“Ha’u nudar ema Matai oan hakarak atu kompete iha suku tanba hanoin atu hadi’a no dezenvolve rai Suku Matai, tanba ida ne’e mak Ha’u mos obrigasaun bele kompete iha eleisaun suku ba periodu 2023-2030, Ha’u mos hetan apoiu husi komunidade Matai oan lubuk ho razaun ida ne’e Ha’u kandidatu ba suku ne’e, tan ne’e iha loron 13 kandidatu hotu ida-idak lori dokumentus ba iha sede suku hodi rejista naran maibe iha selesaun dokumentus iha faillansu balun halo Ha’u la pasa tanba haree husi eleotores ka apoiantes sira nia eleitoral ne’ebé Ha’u lori ba hatama ne’e iha eleitores balu asina no balu hanehan metan ho razaun ida ne’e maka husi meja deside katak ema ne’ebé asina no ida ne’ebé tonan metan labele asina ho ida ne’e mak meja foti desizaun Ha’u labele liu iha selesaun dokumentus iha momentu ne’eba” informa Tobias de Araujo Amaral.

Tobias fundamenta hanesan sidadaun Suku Matai oan nia mos prontu atu servi no dezenvolve suku Maibe sorti at falun nia halo lakonsege pasa iha kandidatu ba xefe suku.

“Nudar ema Matai oan prontu atu servi no hadi’a rai Matai ho ida ne’e maka hakarak atu kandidata ba suku, hanesan Ha’u nia planu primeiru haree liu ba bee moos tanba durante ne’e komunidade halerik tebes tanba ida ne’e mak hakarak atu kandidata ba suku maibe mehi ne’e labele reaiza tanba laliu iha selesaun ba dokumentus” nia dehan.

Tobias esklarese katak nudar ema umanu la triste bainhira submete dokumentus la pasa ne’e tanba buat hotu desizaun husi meja.

“Nudar ema umanu Ha’u sente la triste tanba buat hotu desizaun husi meja, ne’ebé desizaun meja dehan hanesan ne’e prontu ita tuir buat ne’ebé maka meja foti ho ida ne’e Ha’u la laran moras ba buat ne’ebé maka Ha’u la liu, maibe nudar Matai oan ho malu hakarak hadi’a rai Matai ida ne’e” nia afirma.

Entertantu Tobias de Araujo Amaral iha loron 13 submete lista kandidatu suku ba iha meja, hafoin meja verifika dokumentu halo Tobias labele pasa ba iha kandidatu suku, maibe hanesan Matai oan nafatin prontu fo liman ba maluk sira ne’ebé liu husi selesaun dokumentu hodi kandidata ba suku se deit maka eleitu, kontinua servisu hamutuk hodi hadi’a Suku Matai liliu haree ba komunidade nia moris ne’ebé halerik ba bee moos, estrada no seluk tan.

Jornalista :Julio Salinas/Balta Monis

Editor       : Chamot Nahac