Covalima (RCCT) 25-07-25-Estabelesementu Prizaun Suai foin lalais ne’e transfere dadur na’in sanulu resin ida (11) ba iha Prizaun Glenu basa laiha ona espasu hodi akumula prezu sira iha prizaun Suai, ne’ebé lokaliza iha Tabakolot Suku Debos.
Diretór Estabelesementu Prizaun Suai, Rui Gonçalves, relata ba jornalista sira iha nia kna’ar fatin katak numeru dadur iha Prizaun suai dadaun ne’e iha ema na’in 133 ne’ebé ema na’in 13 mak liu ona tarjeitu tan ne’e disidi transfere dadur na’in 11 ba prizaun glenu ne’ebé sei iha fatin ba dadur sira atu hela ba.
“Halo transferensia foin lalais ne’e ita halo ba dadur ema na’in-11 maka ba Prizaun Gleno, razaun tanba iha Prizaun Suai nia prisioneiru 120, mais ita iha ona prijioneiru ema na’in-133, entaun ita liu tiha ona ema na’in-13, maibe iha Prizaun Gleno loloos ne’e sira iha dadur 120 maibe sira seidauk to’o iha tarjetu ida ne’eba, tan ne’e maka ita muda dadur na’in-11 ba iha ne’eba hodi kompleta sira nian iha ne’eba, atu nune’e ita nian bele naton, prozaun Suai iha Bloku-3 ne’ebé iha bloku ida sela lima, kada sela nia as liu maka ema na’in-5 no kada bloku ida as liu ema na’in-40, maibe durante ne’e liu husi numeru ida ne’e” dehan Diretór Estabelesementu Prizaun Suai, Rui Gonçalves.
Rui Gonçalves, antes ne’e prizaun suai iha dadur na’in 133, iha ne’ebé na’in 11 transfere ona ba Glenu no na’in rua seluk hetan ona liberdade, nune’e hela deit dadur na’in 119 mak dadaun ne’e kumpri kastigu iha prizaun suai.
“Agora ita ba ona tarjetu naton tanba ita foin lalais transfere ema na’in-11 ba Gleno no na’in-2 hetan liberdade ona ne’ebe hela de’it ema na’in-119 ne’ebe ne’e naton ba espasu Prizaun Suai nian, sira ne’ebe halo transferensia ne’e hetan tranzijulgadu ita labele halo transferensia ba sira ne’ebe foin tama, ne’e bele halo governu lakon osan bainhira iha julgamentu ba movimentasaun guarda prisional nian, iha movimentasaun nia laran governu tenke sai osan ba ida ne’e” nia dehan.
Engkauntu Prizaun Suai halo tranferensia dadur na’in-11 ba iha Prizaun Gleno iha loron Tersa 22 fulan Jullu 2025, no oras ne’e daudaun iha Prizaun Suai hela dadur hamutuk ema na’in-119, kompostu husi prizaun kondenadu hamutuk ema na’in-106, prozaun preventiva ema na’in-13, husi numeru ne’e Bloku A iha ema na’in-30, Bloku B ema na’in-37, bloku C ema na’in-40 no Kuziña ema na’in-12, no mos dadur na’in-119 ne’e mai husi Munisipiu Covalima rasik hamutuk ema na’in-51, Ainaro ema na’in-27, Bobonaro ema na’in-22 Manufahi ema na’in-18 no Munisipiu Likisa ema na’in-1.
Jornalista : Julio Salinas
Editor : Chamot Nahac
