Covalima (RCCT) 10 -02-25 Prezidente Federasaun Futebol Timor-Leste (FFTL) Nilton T. Gusmão Santos ekonraza jogador sira iha munisipiu Covalima jere tempu no treinu badinas hodi bele kompete ba seleksaun nasional.
Prezidnete FFTL Nilton Gusmão dehan lia ne’e wainhira partisipa iha abertura ba kopa Asosiasaun Futebol Munisipiu Covalima (AFMC) 2025 iha kampu ladi suai, sabadu finde semana foin lalais.
“Futebol la’o regular ona imi tenki uja tempu ne’e ho di’ak atu bele treina extra hodi bele manan, Fisikamente imi bele di’ak liu iha kompetisaun, imi bele hatudu jogu ida ne’ebé di’ak, depois bele anima ita nia sosiedade, ida ne’e mak importante, tan ne’e, iha jogu, iha lakon iha menan, maibe labele lori rezultadu lakon ne’e sai fali inimigu entre ita, ida ne’e la’os finalidade husi futebol” Prezidente Federasaun Futebol Timor-Leste Nilton T. Gusmão Santos hateten lia ne’e iha Kampu ladi suai (08/02).
Iha fatin ne’e, Prezidente Autoridade Munisipiu (PAM) Covalima, Miguel Armada Cardoso “Razão” husu ba Jogador sira atu nafatin kontinua treinu ho rutina no tenki evita konsumu alkohol no Sigaru no hamenus mete tan ne’e estragu jogador sira nia fisiku
“Hakarak fo hanoin hela ba ha’u nia oan sira, ha’u fiar katak ita bo’ot sira iha fisiku di’ak, hakarak dezenvove ita bo’ot sira nia an ne’e kapas, maibe problema ida mak ha’u identifika iha suai dala barak ha’u nia oan Jogador sira la ses husi sigaru, game PUBG no la ses husi Tua. Ida ne’e problema bo’ot, liu husi ida ne’e imi tenki hases an husi sigaru, tua, no deskansa sedu, ha’u fiar katak imi sei kompete iha nasional” Prezidente Autoridade Munisipiu Covalima Miguel Armada Cardoso “Razão” Enkoraza.
Entretantu Kompete iha turneu Kopa AFMC 2025 ne’e mai husi klubu 32 mak eziste iha munisipiu Covalima. Turneu ne’e realiza atu hodi hametin unidade entre juven sira liu husi desportu hodi kontribui ba estabilidade iha rai laran partikularmente iha munisipiu covalima.
Jornalista:Moichung
Editor : Chamot Nahac
