Covalima (TCCT) 30-05-25-Kinta ne’e Institutu Nasional Komabate HIV/SIDA. I.P,(INC-Sida) sosializa informasaun ba komunidade sira iha Suku Thasilin, Postu Administrativu, Zumalai, Munisipiu Covalima hodi fo hanoin ba foin sae sira labele atu ses husi halo sexu livre.
Prezidente Institutu Nasional Komabate HIV/SIDA. I.P, Daniel Marçal, hatete fahe informasaun ba komunidade no juventude sira hodi halo prevensaun ba HIV/Sida ne’e hanesan misaun ida husi INC-Sida, nune’e ema hotu liu liu joven sira bele seguru husi moras hada’et ne’e.
“Oinsa atu prevene HIV ida ne’e autoridade iha intensaun bo’ot tebes atu identifika hodi hapara ona, kestaun maka ita tenke la’o tuir sira, fo informasaun ba sira para halo sira livre labele atu prezudika fali hodi monu ba moras ida ne’e, direitu ema hotu iha direitu, ko’alia ba ema katak sexu ne’e hau nia direitu, maibe direitu ida atu destroi ita nia direitu atu goza iha futuru ne’e ita tenke kontribui halo buat ruma, tanba iha ita nia maun ka alin joven balu ko’alia direitu maibe la hatene konsekuensia husi direitu ne’ebe ameasadu iha futuru” Prezidente Institutu Nasional Komabate HIV/SIDA. I.P, Daniel Marcal, informa lia ne’e ba jornalista sira hafoin remata sosializa informasaun konaba HIV/Sida ba komunidade sira iha Suku Thasilin, Postu Administrativu Zumalai, Kinta (29/05).
Portantu, Administrador Postu Administrativu (APA) Zumalai, Alipio Magno, agradese ba Institutu Nasional Komabate HIV/SIDA. IntitutuPubliku, ne’ebé fahe ona informasaun ba komunidade iha Zumalai durante loron lima hodi nune’e komunidade labele monu ba hahalok risku sira husi HIV/Sida.
“Agradese ba Institutu Nasional Komabate HIV/SIDA. I.P, ne’ebé tau nia planu programa no Zumalai iha suku-8, maibe durante loron lima sira hala’o programa ida ne’e tama sai suku hodi fahe informasaun ba komunidade konaba moras HIV/Sida, hahu husi suku Lepo ohin tama ba loron da haat nia iha Suku Thasilin no finalimente sei iha Suku Zulo, ne’ebé primeiru agradese no durante ne’e ita nia komunidade rona informasaun liu husi media, rona informasaun entre ema ida husi ema seluk, mais detallu ho programa ida hanesan ne’e komunidade sira hatene klean liu oinsa moras HIV/SIDA ne’e labele da’et no mai husi se no se maka lori mai moras ida ne’e?, tanba ida ne’e maka agradese, ita nudar autoridade lokal sei buka meus ida maka sosializasaun husi programa ida ne’e rasik” APA Zumalai dehan.
Administrador Postu Administrativu (APA) Zumalai, Alipio Magno, husu ba Institutu Nasional Komabate HIV/SIDA. I.P Timor-Leste atu kontinua habelar informasaun hanesan liu husi halo sosializa ba komunidade espesial ba Postu Administrativu Zumalai ne’ebé kompostu husi suku 8.
Notisia Relevante : https://www.rcct.tl/daniel-covalima-sei-sai-sentru-dezenvolvimentu-maibe-ameasadu-ho-kazu-hiv-sida/
Jornalista : Julio Salinas
Editor : Chamot Nahac
